Rayon Sports FC yatangaje ko ibirori by’Umunsi w’Igikundiro uzwi nka “Rayon Day” byari biteganyijwe kubera kuri Stade Amahoro byimuriwe kuri Kigali Pelé Stadium, aho bizabera ku wa 18 Nyakanga 2026.
Uyu munsi utegurwa buri mwaka mbere y’uko umwaka w’imikino utangira, ukaba umwanya wo kumurika abakinnyi bashya, abatoza ndetse n’abafatanyabikorwa b’ikipe izakorana na bo mu mwaka w’imikino mushya wa 2026/27.
Mu ijoro ryo ku wa Gatanu tariki ya 10 Nyakanga 2026, Rayon Sports yamenyesheje abakunzi bayo impinduka y’ahazabera ibi birori ibinyujije ku mbuga nkoranyambaga zayo.
Mu butumwa yagize iti: “Ubuyobozi bwa Rayon Sports FC buramenyesha abakunzi bayo, abafatanyabikorwa n’abakunzi b’umupira w’amaguru muri rusange, ko habayeho impinduka ku kibuga kizaberaho ibirori ngarukamwaka bya ‘Rayon Day’ biteganyijwe ku itariki ya 18 Nyakanga 2026.”
Yakomeje igira iti: “Ibi birori byari biteganyijwe kubera kuri Stade Amahoro, byimuriwe kuri Kigali Pelé Stadium. Amasaha, gahunda n’ibirori byateganyijwe bikomeje nk’uko byari biri.”
Umwambaro mushya n’umukino wa gicuti biri mu bizitabwaho
Muri ibi birori, Rayon Sports izamurika ku mugaragaro umwambaro mushya izakoresha mu mwaka w’imikino wa 2026/27.
Hateganyijwe kandi umukino wa gicuti uzahuza Gikundiro na Gor Mahia FC yo muri Kenya, umukino uzafasha amakipe yombi kwitegura imikino ya CECAFA Kagame Cup 2026 izabera i Kigali.
Rayon Sports iri kwitegura umwaka w’imikino uzaba urimo amarushanwa atandukanye, harimo CAF Confederation Cup ndetse na Shampiyona y’u Rwanda, BK Pro League.
