Minisitiri w’Ububanyi n’Amahanga n’Ubutwererane w’u Rwanda, Olivier Nduhungirehe, ari kumwe na Minisitiri w’Ubuzima, Dr Sabin Nsanzimana, na Minisitiri w’Ubucuruzi n’Inganda, Tony Kajangwe, bagiranye ibiganiro n’abahagarariye ibihugu by’amahanga mu Rwanda ku ngamba zo guhangana n’ikibazo cy’ibinyobwa bisindisha bitemewe, birimo inzoga zikunze kwitwa ‘ibyuma’.
Ibiganiro byabaye ku wa 21 Kanama 2026, bigamije gusobanurira abadipolomate uburyo Guverinoma y’u Rwanda iri guhangana n’iki kibazo, ndetse n’ingamba zashyizweho mu rwego rwo kurengera ubuzima bw’abaturage no gukomeza kubaka umuryango nyarwanda ushobora guhangana n’ibibazo bitandukanye.
Minisiteri y’Ububanyi n’Amahanga yavuze ko iyi nama yahaye u Rwanda umwanya wo gusangiza abafatanyabikorwa mpuzamahanga uko rubona ikibazo cy’ibinyobwa bisindisha bitemewe, ndetse no gusobanura imbaraga ziri gushyirwa mu guhangana n’ingaruka zabyo.
Guverinoma y’u Rwanda ivuga ko intego ari ukurinda ubuzima rusange, gukomeza ubudahangarwa bw’umuryango nyarwanda no gukorana n’abafatanyabikorwa mu gushakira hamwe ibisubizo birambye.
Iyi nama ibaye mu gihe u Rwanda rukomeje ibikorwa byo guhangana n’ibinyobwa bisindisha bitemewe, nyuma y’uko bigaragaye ko bishobora guteza ibibazo bikomeye ku buzima bw’ababinywa ndetse no ku mibereho y’imiryango.
Mu byumweru bibiri gusa, mu Mujyi wa Kigali hafunzwe inganda 30 zakoraga inzoga zitujuje ubuziranenge, utubari 840 n’amaduka 10 acuruza inzoga atujuje ibisabwa.
Ku rwego rw’igihugu, Guverinoma yafashe ingamba zirimo gufunga inganda zirenga 130 zikekwaho gukora izi nzoga, ibikorwa byo kuzifata no kuzimena, ndetse no gukurikirana abakekwaho kugira uruhare mu ikorwa n’ikwirakwizwa ryazo.
Kugeza ubu, abantu barenga 80 bamaze gutabwa muri yombi mu bikorwa by’iperereza. I Kigali kandi hafashwe litiro zirenga 470,000 za ethanol yakoreshwaga mu gukora izi nzoga, ndetse hakusanywa hafi amacupa miliyoni enye y’ibinyobwa bitujuje ubuziranenge.
Izi ngamba zikomeye zafashwe nyuma y’uko inzego z’ubuzima zigaragaje ko ikibazo cy’inzoga zitemewe cyagize ingaruka zikomeye ku buzima, aho abantu barenga 500 bavuwe, abarenga 50 bakaba barapfuye, mu gihe abandi barenga 100 bagize ikibazo cyo kutabona.
