Ikipe ya Arsenal ikina shampiyona yo mu Bwongereza ikaba ikomeje guhatanira ibikombe bitandukanye dore ko iri mu bikombe bitatu aribyo UEFA Champions League, Premier League na FA Cup, ishobora gukomwa mu nkokora n’imvune nyuma y’uko umukinnyi wa 10 avunikiye mu ikipe y’igihugu.
Ku munsi w’ejo ni bwo byatangajwe ko Martín Zubimendi, yavuye mu ikipe y’igihugu ya Espagne bitewe n’ikibazo afite cyo kugira uburibwe bwo mu ivi.
Nk’uko ikinyamakuru Mirror.co.uk cyabyanditse kivuga ko Ikipe y’igihugu Igaragaza ko hafashwe icyemezo cyo kumukuramo hagamijwe kumurinda kongera gukomereka, ndetse abaganga ba Arsenal bahise babimenyeshwa.
Zubimendi yari yinjiye mu kibuga asimbuye Rodri mu mukino wa gicuti batsinzemo Serbia ku wa Gatanu w’icyumweru gishize.
Si we wenyine wa Arsenal uheruka kuva mu ikipe y’igihugu kubera imvune kubera ko na myugariro Piero Hincapié na we yavuye mu mwiherero w’ikipe y’igihugu ya Ecuador, nyuma yo gukina iminota 72 mu mukino batsinzwemo na Maroc.
Amakuru aravuga ko yahise asubira mu Bwongereza kugira ngo atangire kwitabwaho n’abaganga, nubwoikibazo yagize kitatangajwe ku mugaragaro.
Aba biyongereye ku bandi bakinnyi bakomeye ba Arsenal barimo Declan Rice na Bukayo Saka, na bo batigeze bitabira umwiherero w’ikipe y’igihugu y’u Bwongereza kubera imvune.
Aba bombi ntibakinnye mu mukino banganyijemo na Uruguay, ndetse ntibazagaragara no mu mukino uzabahuza n’u Buyapani.
Si abo gusa kuko n’abandi bakinnyi bavunitse barimo; William Saliba, Gabriel Magalhães, Leandro Trossard na Jurriën Timber.
Ibi birimo biraba mu gihe Arsenal iri mu rugamba rwo kwegukana ibikombe bitatu, aho izahura na Southampton muri FA Cup, igakurikizaho Sporting Lisbon muri Champions League, mbere yo guhura na Manchester City mu mukino ukomeye wa shampiyona.
Nubwo Arsenal iri ku mwanya wa mbere n’ikinyuranyo cy’amanota 9 kuri Manchester City iyikurikiye, ikibazo cy’imvune z’abakinnyi benshi gishobora kuyigiraho ingaruka zikomeye.
