Minisitiri w’Ibikorwa by’Ubutabazi, Maj Gen (Rtd) Albert Murasira, yatangije ku mugaragaro imirimo yo kuvugurura Ikigo Nderabuzima cya Nyarubuye giherereye mu Karere ka Kirehe, hagamijwe kugishyira ku rwego rwisumbuye rutanga serivisi zisa n’iz’ ibitaro, zizwi nka Medicalized Health Centre.
Uyu mushinga watangijwe ku wa 5 Ugushyingo 2025, uzatuma abaturage bakoreraga ingendo ndende bajya kwivuza kure bagabanyirizwa urugendo ndetse n’amafaranga byabatwaraga.
Biteganyijwe ko Ikigo Nderabuzima cya Nyarubuye nikimara kuvugururwa, kizunganira Ibitaro bya Kirehe, kikajya cyakira abaturage bo mu mirenge ya Mahama, Nasho, Mpanga, Nyarubuye na Mushikiri.
Uyu umushinga ni igice cy’umushinga mugari wa “Jya Mbere”, ugamije guteza imbere ubukungu n’imibereho myiza y’impunzi n’Abanyarwanda, uterwa inkunga na Leta ya Denmark binyuze muri gahunda yayo y’iterambere mpuzamahanga (DANIDA).
Miliyari 5 Frw ni zo zizakoreshwa mu kuvugurura iki kigo, kizaba gifite ibyumba bibiri byo kubaga, ahakirirwa ababyeyi n’abategereje kubyara, ahakurikiranirwa abana bavutse batagejeje igihe, ahavurirwa indembe, n’ibitanda 110 byo kwakira abarwayi.
Minisitiri Murasira yabwiye abaturage ati:
“Ingendo ndende mwakoraga mujya gushaka serivisi z’ubuzima zisumbuye zizagabanyuka, bityo muzigami igihe n’amafaranga. Uyu mushinga kandi uzatanga akazi ku rubyiruko n’abakuru, bikazafasha mu gukemura ibibazo by’imibereho no kurwanya ubukene.”
Umuturage wo muri Nyarubuye, Mukabugingo Speciose, yashimiye Leta ati:
“Iri vuriro twararisabye, none turashimira ubuyobozi bwacu ko bwatwumvise. Bizadufasha kwivuriza hafi, tutiriwe tujya kure.”
Ambasaderi wa Denmark mu Rwanda, Sahr Kpundeh, yavuze ko bishimiye gutanga inkunga kuri uyu mushinga uzafasha abaturage benshi kubona serivisi z’ubuvuzi hafi, kandi yizeza ko azagaruka gusura iki kigo nicyuzura.
Umushinga Jya Mbere, watangijwe mu 2019, ni umwe mu mishinga y’icyitegererezo ishyirwa mu bikorwa na MINEMA, ku nkunga ya Banki y’Isi n’abandi bafatanyabikorwa. Witezweho kunoza serivisi z’ibanze, guteza imbere ubukungu, no kurengera ibidukikije mu turere ducumbikiye impunzi nka Kirehe, Gatsibo, Karongi, Nyamagabe, Gisagara, Gicumbi, Huye, Bugesera na Kigali.
Kugeza ubu, Jya Mbere umaze gufasha abantu barenga 700.000, barimo impunzi ibihumbi 121 n’Abanyarwanda ibihumbi 592, babonye ibikorwa remezo birimo ibigo nderabuzima, amashuri, amazi meza, imihanda, amasoko n’ibindi
