Nyuma y’imyaka itatu ayibereye Umunyamabanga Mukuru, Kana Bernie Axella yamaze gusezerera kuri izi nshingano ku mpamvu ze bwite.
Kuri uyu wa mbere, ni bwo inkuru y’isezera kuri izi nshingano kwa Axella, yamenyekanye. Ubwo abayobozi ba Rayon Sports na Rayon Sports WFC, bakoranaga inama n’abakozi bo mu biro b’aya makipe yombi, ni bwo habayeho izi mpinduka.
Kana Bernie Axella, yahise ashyikiriza ubuyobozi ibaruwa isezera ku kazi k’Ubunyamabanga Bukuru bwa Rayon Sports WFC yari amazeho imyaka itatu nyuma yo kuzifata mu 2022.
Izi mpinduka zije zisanga iyi kipe ikomeje kwitegura kujya muri Cecafa y’abagore izabera muri Tanzania muri Nzeri uyu mwaka. Iri rushanwa ni ryo ritanga ikipe imwe ihagararira Akarere ka Afurika y’i Burasirazuba n’iyo Hagati [CECAFA] muri CAF Women’s Champions League.
