Ofisiye mukuru mu ngabo z’u Rwanda zirwanira mu kirere, Lieutenant Colonel Safari Rumori, ku wa 25 Kamena 2025 yarangije amasomo mu ishuri rikuru rya gisirikare ry’u Bufaransa.
Ibi birori byitabiriwe n’umuyobozi muri Ambasade y’u Rwanda mu Bufaransa ushinzwe ibikorwa bya gisirikare, Colonel Claver Karara.
Aya masomo yatangiye muri Kanama 2024, yitabiriwe n’abanyeshuri barenga 360 barimo Abafaransa barenga 200 n’abandi 98 baturutse mu bindi bihugu 66.
Ambasade y’u Rwanda yatangaje ko Lt Col Rumori yitwaye neza cyane muri aya masomo.
Ishuri rikuru rya gisirikare ry’u Bufaransa rihugura abasirikare bo mu ngabo zirwanira ku butaka, mu kirere, mu mazi ndetse na jandarumori.
Ribaha ubumenyi bwo gutegura ibikorwa bya gisirikare no kuyobora abandi basirikare mu bikorwa bitandukanye, bikajyanishwa n’ibihe bigezweho.
