Amakipe ahagarariye u Rwanda mu irushanwa ry’Isi rihuza amarero ya Paris Saint-Germain Academy yitwaye neza yegukana umudali wa feza mu batarengeje imyaka 11 n’abatarengeje imyaka 13 mu bahungu, ndetse n’umuringa mu bakobwa batarengeje imyaka 15.
Mu batarengeje imyaka 11, u Rwanda rwatangiye neza mu matsinda aho rwatsinze Canada 2-1, Team Academy 2-0, runganya na Thailand 0-0. Mu mikino yo gukuranamo, rwageze muri ½ nyuma yo gutsinda Amerika 3-1, ariko ruza gutsindwa na Bahrain 2-1, hanyuma no ku mukino wa nyuma rutsindwa na Brésil 3-0.
Mu batarengeje imyaka 13, u Rwanda rwashegeshe u Bwongereza 4-0, rutsinda Team Academy 4-0 na Mexique 5-0. Rwageze muri ½ rutsinze West Indies kuri penaliti 3-2 nyuma yo kunganya 0-0, ariko ku mukino wa nyuma rutsindwa n’u Bufaransa 2-1, bityo rwegukana umudali wa feza.
Mu bakobwa batarengeje imyaka 15, u Rwanda rwatsinze u Bwongereza 5-1, rugera muri ½ ariko rutsindwa na Brésil 1-0. Nyuma yaho, rwitwaye neza mu mukino wo guhatanira umwanya wa gatatu aho rwatsinze u Bufaransa kuri penaliti 3-1, rwegukana umudali w’umuringa.
Muri iri rushanwa, Ineza Ange Landry yabaye umukinnyi watsinze ibitego byinshi mu batarengeje imyaka 13 aho yatsinze ibitego 17, mu gihe Irinatwe Aimée ari we watsinze byinshi mu bakobwa atsinda 9.
Muri rusange, Brésil ni yo yegukanye igikombe mu batarengeje imyaka 11 n’abakobwa batarengeje imyaka 15, mu gihe u Bufaransa bwacyegukanye mu batarengeje imyaka 13.
U Rwanda rukomeje kwigaragaza neza muri iri rushanwa kuko rusanzwe rwararyegukanye inshuro ebyiri zikurikiranya mu 2023 no mu 2024.
