Umuhanzi w’Umunyarwanda The Ben yegukanye igihembo cy’umuhanzi mwiza muri Afurika y’Iburasirazuba (East Africa Best Artist) mu bihembo bya HiPipo Music Awards 2026 byatangiwe i Kampala muri Uganda, mu ijoro ryo ku wa 13 Ugushyingo 2026.
The Ben yari ahatanye n’abandi bahanzi 11 bo muri aka karere barimo Ali Kiba, Bien, Diamond Platnumz, Dr. Jose Chameleone, Element EleéeH, Harmonize, John Frog, Joshua Baraka, Natacha, Sheebah na Silver X.
Uyu muhanzi yari ahagarariye u Rwanda mu byiciro bitatu birimo East Africa Best Artist, Africa Number One na East Africa Best Act/Song, abikesha indirimbo ye ‘Inshallah’.
Nubwo yegukanye igihembo cya East Africa Best Artist, mu cyiciro cya Africa Number One cyegukanywe na Joshua Baraka, wari uhatanye n’abahanzi bakomeye barimo The Ben, Asake, Ayra Starr, Burna Boy, Diamond Platnumz, DJ Maphorisa, Dr. Jose Chameleone, Mohamed Ramadan, Tyla na Uncle Waffles.
Mu kindi cyiciro cya East Africa Best Act/Song, igihembo cyegukanywe n’indirimbo ‘This Time’ ya Joshua Baraka afatanyije na JAE5.
Iyi ndirimbo yatsinze izindi zari zihanganye na yo zirimo ‘Inshallah’ ya The Ben, ‘Pom Pom’ ya Bruce Melodie afatanyije na Diamond Platnumz na Brown Joel, ‘Ayayaah’ ya Element EleéeH yakoranye na Bien na Joshua Baraka, ndetse na ‘Happy’ ya Diamond Platnumz.
Iki gihembo The Ben yegukanye ni ikindi yongeye kongera ku byo amaze kugeraho mu muziki, nyuma y’uko mu mwaka ushize wa 2025 yari yegukanye igihembo cya Best East Africa Act/Song abikesha indirimbo ye ‘True Love’.

HiPipo Music Awards ni ibihe bihembo bimaze imyaka 15
HiPipo Music Awards ni ibihembo bitegurwa n’ikigo HiPipo cyo muri Uganda, bigamije kumenyekanisha no gushimira abahanzi, indirimbo n’abandi bagira uruhare mu iterambere ry’umuziki.
Inkomoko yabyo ishingiye ku gikorwa cya HiPipo Charts Festival cyatangiye mu 2012. Umuhango wa mbere wo gutanga ibihembo nyirizina wabaye ku wa 9 Gashyantare 2013, kuri Theatre La Bonita i Kampala.
Mu 2026, ibi bihembo byatanzwe ku nshuro ya 15, bikaba bikomeje kuba urubuga ruhuriza hamwe no kumenyekanisha impano z’abahanzi bo muri Uganda, Afurika y’Iburasirazuba no muri Afurika muri rusange.
Kwegukana iki gihembo kwa The Ben ni indi ntambwe mu kumenyekanisha umuziki nyarwanda ku rwego rw’akarere, cyane cyane ko yari ahatanye n’abahanzi bafite amazina akomeye mu muziki wa Afurika.









