Umunyarwandakazi Murekatete Bella yerekeje muri Toulouse Métropole Basket iheruka kuzamuka mu Cyiciro cya Mbere mu Bufaransa (La Boulangère Wonderligue).
Umwaka ushize w’imikino, Murekatete yawukinnye muri Cadí La Seu yo muri Espagne, icyakora akubutse muri Club Freseras de Irapuato Básquetbol yo mu Cyiciro cya Mbere muri Mexique, yakiniye Imikino ya Kamarampaka mu kwezi gushize.
Toulouse Métropole Basket uyu mukinnyi yerekejemo yegukanye Igikombe cya Shampiyona y’Icyiciro cya Kabiri, biyihesha kuzamuka mu cya mbere.
Murekatete ni umwe mu bakinnyi beza u Rwanda rufite kuko uretse kuba agenderwaho mu Ikipe y’Igihugu yananditse amateka menshi muri Washington State Cougars yo muri Leta Zunze Ubumwe za Amerika yakiniye igihe kinini.
Ategerejwe mu Ikipe y’Igihugu izitabira Igikombe cya Afurika kizabera muri Côte d’Ivoire hagati ya tariki ya 25 Nyakanga na 3 Kanama 2025.
Murekatete ni umukobwa w’imyaka 24 wavukiye mu Karere ka Huye, wakuze akina Umupira w’Amaguru na Volleyball mbere yo kwisanga muri Basketball.
Mu 2022 yegukanye igihembo cy’umukinnyi wazamuye urwego muri Shampiyona. Murekatete yakiniye amakipe y’igihugu mu byiciro bitandukanye nko mu batarengeje imyaka 16, 18 ndetse no mu ikipe nkuru
