Abahanzi Nyarwanda Nel Ngabo na Kivumbi King basusurukije abakunzi b’umuziki nyafurika mu iserukiramuco rya AfrOstrava 2026, ryabereye muri Repubulika ya Tchèque.
Aba bahanzi bataramiye abitabiriye iri serukiramuco mu ijoro ryo ku wa 15 Kanama 2026, nyuma y’uko ryari ryatangiye ku wa 14 Kanama, rihuriza hamwe abakunzi b’umuziki n’umuco nyafurika baba muri Tchèque no mu bindi bihugu by’u Burayi.
Nel Ngabo ni we wabanje kujya ku rubyiniro, asusurutsa abitabiriye igitaramo mu ndirimbo zirimo ‘Muzadukumbura’, ‘Nywe’ na ‘Zoli’, n’izindi.
Nyuma ye, Kivumbi King na we yageze ku rubyiniro aririmba zimwe mu ndirimbo ze zakunzwe, zirimo ‘Wait’, ‘Mama’, ‘Keza’, ‘Ituze’ na ‘Yarampaye’.
Mbere yo kuva ku rubyiniro, Kivumbi yongeye guhamagara Nel Ngabo, maze bombi baririmbana indirimbo ‘Slim Daddy’, bahuriyemo na DJ Toxxyk.
Nyuma y’igitaramo, aba bahanzi bagiranye ikiganiro kigufi n’Umunya-Nigeria CKay, mbere y’uko na we ajya ku rubyiniro gususurutsa abitabiriye.
Iki gitaramo cyabaye nyuma y’uko Nel Ngabo na Kivumbi King bakiriwe na Ambasaderi w’u Rwanda muri Repubulika ya Tchèque. Mu bari bitabiriye igitaramo kandi harimo Abanyarwanda baba muri iki gihugu.
‘AfrOstrava’ ni iserukiramuco ryibanda ku muziki n’umuco nyafurika, rihuza abahanzi n’abakunzi b’umuco nyafurika muri Tchèque no mu bindi bihugu by’u Burayi. Uretse ibitaramo, riba ririmo ibikorwa bitandukanye birimo imbyino, kumurika umuco nyafurika, ibiribwa gakondo n’ibindi.
Nyuma y’ibikorwa byabo muri Tchèque, Nel Ngabo na Kivumbi King biteganyijwe ko bazasubira i Kigali, ariko bakabanza gutembera mu bihugu bimwe na bimwe by’u Burayi.
