Izina rya Iradukunda Aimable, wamamaye nka Yugi Umukaraza, riri mu ari kuvugwa cyane ku mbuga nkoranyambaga no mu bitangazamakuru nyuma y’uko umunyamideli akaba n’umushyushyarugamba ku mbuga nkoranyambaga, Shaddyboo, amushinje kumusambanya ku gahato.
Nubwo ari inkuru ikomeje gukurikiranwa n’inzego zibishinzwe, benshi bibajije uwo Yugi Umukaraza ari we.
Umwarimu wa muzika wanize i Nyundo
Yugi Umukaraza ni umwe mu bahanzi bakiri bato bari kuzamuka mu muziki nyarwanda. Uretse kuba ari umuhanzi, asanzwe ari umwarimu wigisha muri Rwanda School of Creative Arts and Music (RSCAM), ishuri ryahoze rizwi nka Nyundo Music School, riherereye mu Karere ka Muhanga.
Yasoje amasomo muri iri shuri mu mwaka wa 2018, mu cyiciro kimwe n’umuhanzi Kenny Sol n’abandi banyamuziki bamaze kubaka amazina mu Rwanda. Nyuma yo kurangiza amasomo ye, yakomeje gukorana n’iri shuri aho yigisha cyane cyane ibijyanye no kuvuza ingoma n’ubumenyi bwa muzika.
Umuhanzi uri kubaka izina rye
Nubwo ataramara igihe kinini mu ruhando rwa muzika nyarwanda, Yugi Umukaraza amaze gushyira hanze ibihangano byamufashije kumenyekana mu bakunzi b’umuziki.
Yatangiye kumenyekana binyuze mu ndirimbo yise “Higher”, nyuma akurikizaho “Location”, mbere yo gukomeza urugendo rwe ashyira hanze “Cheers” yakoranye n’umuraperi Ish Kevin.
Iyi ndirimbo “Cheers” ni imwe mu zamufashije kugera ku bakunzi benshi ba muzika, cyane cyane ko ubufatanye bwe na Ish Kevin bwatumye ibikorwa bye bitangira gukurikiranwa cyane.
Akora Afro-Fusion ivanze n’umwimerere nyarwanda
Yugi Umukaraza azwi cyane mu njyana ya Afro-Fusion, aho ahuza amajwi agezweho n’imiririmbire ikubiyemo umwimerere n’injyana gakondo nyarwanda.
Abasesenguzi ba muzika bagiye bagaragaza ko afite ubushobozi bwo kuririmba no gucuranga ibikoresho bya muzika bitandukanye, ibintu byatumye bamwe bamubonamo umwe mu bahanzi bashobora kuzagira uruhare rukomeye mu iterambere ry’umuziki nyarwanda mu myaka iri imbere.
Ari mu nkuru zikomeje kuvugisha benshi
Kuri ubu, Yugi Umukaraza ari mu bantu bari kuvugwa cyane nyuma y’uko Shaddyboo atangaje ko yamusambanyije ku gahato nyuma yo kumusura iwe mu ijoro ryo ku wa 21 Kamena 2026.
Ibi birego ntibirahabwa umurongo n’inzego z’ubutabera cyangwa iz’ubugenzacyaha, ndetse Yugi Umukaraza na we ntabwo aragira icyo abitangazaho ku mugaragaro.
Mu gihe hakomeje gutegerezwa icyo iperereza rizagaragaza, ibikorwa bya Yugi Umukaraza bikomeje gukurikirwa n’abakunzi ba muzika nyarwanda bashaka kumenya uko iki kibazo kizakemuka.
