Senateri Dr Uwamariya Valentine yasabye urubyiruko rushaka gushinga ingo kubanza gufata umwanya uhagije wo kumenyana no kumvikana ku buzima bagiye kubanamo, anabibutsa ko bagomba kwihanganira imbogamizi zishobora kuvuka mu muryango.
Ibi akaba yabitangarije mu kiganiro cyatambutse kuri RBA kuri uyu wa 4 Gicurasi 2026.
Mu butumwa bwe, yagaragaje ko bamwe mu rubyiruko bihutira gufata icyemezo cyo gushyingirwa batabanje kuganira bihagije ku ntego z’ubuzima bwabo, bigatuma baza guhura n’ibibazo batiteguye.
Ati: “Inama nabagira ni ukubanza kwitonda mukagira ibyo mwumvikana n’uwo muzabana, mugafata umwanya ntimuhutireho.”
Yongeyeho ko kubaka urugo bisaba ubwitange n’ubushobozi bwo kwihanganira ibigeragezo by’ubuzima busanzwe birimo ibibazo by’ubukungu, uburwayi n’andi makimbirane ashobora kuvuka.
Ati: “Igikomeye kurushaho ni ukumenya kwihangana. Hazamo ibibazo by’ubukungu, uburwayi n’ibindi bitandukanye.”
Yashimangiye ko iyo abantu bahisemo kubana, bagomba gusangira ibyiza n’ibibi, bagafatanya gushaka ibisubizo kuko nta muntu wifuza kubaho nabi.
Ibi bije mu gihe imibare igaragaza ko isenyuka ry’ingo rikomeje kwiyongera, cyane cyane mu bashakanye bakiri bato.
Raporo y’Ikigo cy’Igihugu cy’Ibarurishamibare igaragaza ko mu 2025 ingo 2,629 zahawe gatanya binyuze mu nkiko, aho 41,1% byazo zari zimaze igihe kitageze ku myaka 10 zibana.
Iyo mibare inagaragaza ko ingo zimaze igihe kirekire zibana zitandukana ari nke cyane, kuko izimaze imyaka irenga 45 ari 18 gusa.
Mu mibare rusange y’ingo zatandukanye mu 2025, Umujyi wa Kigali ni wo uza ku isonga, ukurikwa n’Intara y’Iburasirazuba, Amajyepfo, Iburengerazuba n’Amajyaruguru.
ku rubyiruko, rukamenya ko kubaka urugo ari urugendo rurerure rusaba gutekereza neza, kumvikana no kwihangana.
