Liechtenstein Yatunguranye Itsinda Tanzania 1-0 muri FIFA Series 2026 iri kubera i Kigali
Ikipe y’Igihugu ya Liechtenstein iri ku mwanya wa 204 ku rutonde rwa FIFA, yatunguye benshi itsinda Tanzania igitego 1-0 mu mukino wa FIFA Series 2026 uri kubera i Kigali mu Rwanda.
Iyi mikino ya gicuti iri gutegurwa na FIFA, igamije guhuza ibihugu bidakunze kubona amahirwe yo gukina hagati yabyo, ikomeje kubera mu Rwanda kuva kuri uyu wa Kane.
Ku mukino wabanje wabereye kuri Kigali Pelé Stadium, Aruba yatsinze Macau ibitego 4-1. Nyuma yaho, hakinwe umukino wo mu Itsinda B wahuje Tanzania iri ku mwanya wa 113 ku Isi na Liechtenstein ya 204.
Tanzania yatangiye umukino isatira cyane ishaka igitego cya mbere. Ku munota wa karindwi, Fei Toto yahaye umupira mwiza Mwalimu Selemani ariko ananirwa kuwushyira mu izamu. Yakomeje gusatira, aho Selemani yongeye kubona amahirwe ku munota wa 11 ariko ishoti rye rinyura hejuru y’izamu.
Liechtenstein yabonye uburyo bwa mbere bufatika ku munota wa 42, aho Saglam Ferhat yateye ishoti rikomeye ryakuwemo n’umunyezamu Aishi Manula.
Mbere gato y’uko igice cya mbere kirangira, Tanzania yongeye guhusha igitego cyabazwe ubwo ishoti rya Miroshi Novatus ryakubitaga igiti cy’izamu.
Mu gice cya kabiri, Liechtenstein yagarutse ifite inyota yo gutsinda. Ku munota wa 56, Saglam Ferhat yatsinze igitego rukumbi cy’umukino, asiga ba myugariro ba Tanzania maze aroba umunyezamu Manula.
Nyuma y’iminota mike, Hasler Alessio yari hafi gutsinda igitego cya kabiri cya Liechtenstein, ariko Manula aratabara.
Nubwo Tanzania yakoze impinduka zitandukanye, zirimo kwinjiza Kibabage Nickson, Abraham Morice na Abbas Mudathir, ntibyabashije kuyifasha kwishyura.
Umukino warangiye Liechtenstein itsinze igitego 1-0, ihita igera ku mukino wa nyuma aho izahura na Aruba ku Cyumweru, mu gihe Tanzania izakina na Macau mu guhatanira umwanya wa gatatu.
Ku wa Gatanu, tariki ya 27 Werurwe 2026, hazakomeza imikino y’Itsinda A, aho Kenya izakina na Estonia Saa 18:00, mu gihe Amavubi azakina na Granada Saa 21:00 kuri Stade Amahoro.
