Urukiko rw’Ibanze rwa Kicukiro rwategetse ko Iradukunda Aimable uzwi nka Yugi Umukaraza afungwa by’agateganyo iminsi 30, nyuma yo gusanga hari impamvu zikomeye zituma akekwaho icyaha cyo gukora ibikorwa bifitanye isano no gukoresha ibiyobyabwenge cyangwa urusobe rw’imiti ikoreshwa nka byo.
Mu mwanzuro w’urwo rubanza rwabereye mu muhezo, Urukiko rwagaragaje ko nta mpamvu zikomeye zituma akekwaho icyaha cyo gukoresha undi imibonano mpuzabitsina ku gahato, ari cyo cyaha yari yabanje gukurikiranwaho.
Nubwo icyo cyaha kitabonetseho impamvu zikomeye zo gukomeza kugikurikiranaho muri iki cyiciro, Urukiko rwategetse ko Yugi Umukaraza akomeza gufungwa by’agateganyo mu gihe cy’iminsi 30 kubera icyaha cy’ibiyobyabwenge akekwaho.
Yugi Umukaraza yatawe muri yombi ku wa 23 Kamena 2026, nyuma y’ikirego cyatanzwe na Mbabazi Shadia, uzwi nka Shaddyboo, wavuze ko yamusambanyije ku gahato mu ijoro ryo ku wa 21 Kamena 2026, amufatiranye mu ntege nke nyuma yo gusangira inzoga.
Mu iperereza ryakurikiyeho, Urwego rw’Igihugu rw’Ubugenzacyaha (RIB) rwongeye ku byaha Yugi Umukaraza akurikiranyweho icyaha cyo gukora ibikorwa bifitanye isano n’ibiyobyabwenge.
Hagati aho, ku wa 6 Nyakanga 2026, Shaddyboo na we yajyanywe ku bushake bwe muri Isange Rehabilitation Centre, nyuma y’uko ibisubizo by’ibizamini byagaragaje ko yari afite ibiyobyabwenge mu mubiri.
RIB yatangaje ko yajyanywe muri icyo kigo kugira ngo afashwe kureka gukoresha ibiyobyabwenge, ahabwe ubufasha bwo mu buzima bwo mu mutwe, ndetse hanakorwe isuzuma ryimbitse rigamije kumenya impamvu zishobora kuba zituma abikoresha.
Urubanza ku byaha Yugi Umukaraza akekwaho ruzakomeza mu nkiko hakurikijwe amategeko.
