Reka turebere hamwe umusaruro w’umutoza wa APR FC ufite 52% muri rusange kuva afashe iyi kipe.
Uko Taleb yitwaye mu mikino ya gicuti
APR FC yakinnye imikino itandatu ya gicuti, aho yatsinze Gasogi United ibitego 4-1, inganya na Gorilla FC ibitego 2-2 na 1-1 mu mukino wo kwishyura, yatsinze Intare FC ibitego 4-0 gusa Taleb yahise atsindwa na Police FC ibitego 2-1, asoreza kuri Bugesera FC ayitsinda ibitego 2-0 mu mukino wabereye i Bugesera.
APR FC mu nkera y’Abahizi Tournament 2025
APR FC yiteguriye irushanwa ndetse iryita Inkera y’Abahizi ariko yasoje iri ku mwanya wa nyuma kuko Igikombe cyatwawe na Police FC. Mu nkera y’Abahizi tournament, APR FC yakinnye umukino ufungura ariko utarabazwe muri iryo rushanwa itsinda Power Dynamos ibitego 2-0. Nyuma APR FC yatsinzwe na AS Kigali kuri Penaliti 5-4 nyuma yo kunganya igitego 1-1. APR FC yasuzuguritse mu mikino ibiri yakurikiyeho kuko yatsinzwe na Police FC ibitego 3-2 na Azam FC ibitego 2-0 mu mukino wabereye muri Stade Amahoro.
Uko APR FC yitwaye muri CECAFA KAGAME CUP 2025
Muri CECAFA KAGAME CUP yabereye Dar Es Salaam muri Tanzania APR FC yasoje ku mwanya wa Gatatu nyuma yo gutsinda KMC igitego 1-0. Mu mikino yabanje mu itsinda, APR FC yatsinze Bumamuru ibitego 2-0, itsinda Mlandege ibitego 2-0 isoza itsinda inganya na KMC igitego 1-1. APR FC yasezerewe muri ½ na Al Hilal Omdurman ku bitego 3-1.
Uko APR FC yitwaye muri CAF Champions League.
APR FC ifatwa nk’ikipe ya mbere mu Rwanda yatomboye Pyramids FC mu Ijonjora ry’ibanze ry’imikino Nyafurika ya CAF Champions League, gusa yahise isesererwa kuko yatsinzwe na Pyramids FC umukino ubanza ibitego 2-0 na 2-0 mu mukino wo kwishyura wabereye mu Misiri.
APR FC Muri Rwanda Premier League
Abenshi batekerezaga ko APR FC igiye kuza yihimura ku makipe yo mu Rwanda ariko siko biri kugenda mu mikino 8 imaze gukina. Mu mikino 8 APR FC imaze gukina yatsinzemo imikino 4 inganya 3 itsindwa 1. Ubu igiye guhura na Etincelles FC iri ku mwanya wa kane n’amanota 15.
Bamwe batangiye gushidikanya ku mitoreze ya Taleb kuko ntiwamenya niba akina asatira cyangwa yugarira. Mu mikino 25 amaze gukina yinjiye ibitego 38 atsindwa 28. Ibi bisobanura ko byibuze kuri buri mukino yinjiza igitego ariko agatsindwa ikindi.
Ubusesenguzi bwaturutse mu mikino Abderrahim Taleb yatoje APR FC, bwerekana ko afite umusaruro wa 52% ndetse mu mikino 25 yose yakinnye, APR FC yatsinze 11, inganya 6, itsindwa 8, yatsinze ibitego 38, yinjizwa 28.
