Arsenal yegukanye Igikombe cya Shampiyona y’u Bwongereza, Premier League, nyuma y’imyaka 22 idatwara iri rushanwa. Ni nyuma y’uko Manchester City inganyije na AFC Bournemouth igitego 1-1.
Kuri uyu wa Kabiri, tariki ya 19 Gicurasi 2026, ni bwo Manchester City yakinnye umukino wayo w’Umunsi wa 37 wa Premier League wabereye kuri Vitality Stadium imbere y’abafana barenga ibihumbi 11.
AFC Bournemouth yafunguye amazamu ku munota wa 39 ku gitego cyatsinzwe na Eli Junior Kroupi, mbere y’uko Manchester City ishaka kwishyura kugeza ibonye igitego ku munota wa gatanu w’inyongera cyinjijwe na Erling Haaland.
Kunganya uyu mukino byatumye Manchester City itozwa na Pep Guardiola igira amanota 78, irushwa amanota ane na Arsenal mu gihe hasigaye umukino umwe gusa wa shampiyona.
AFC Bournemouth na yo yahise yemeza ko izahagararira u Bwongereza mu marushanwa y’i Burayi, ibintu iyi kipe yari imaze imyaka 127 itageraho.
Arsenal yaherukaga gutwara Premier League mu mwaka w’imikino wa 2003/04 ubwo yayitwaraga idatsinzwe umukino n’umwe. Ni igikombe cya kane cya shampiyona y’u Bwongereza yegukanye, nyuma y’ibyo yatwaye mu 1997/98, 2001/02 na 2003/04.
Iyi kipe ifitanye ubufatanye n’u Rwanda kuva mu 2018 binyuze muri gahunda ya Visit Rwanda, gusa ubu bufatanye buzasoza uyu mwaka w’imikino wa 2025/26.
Arsenal izasoza shampiyona yakira Crystal Palace ku Cyumweru Saa 17:00, mbere yo gukomeza urugendo rwo gukora amateka mashya muri UEFA Champions League aho ifitanye umukino na Paris Saint-Germain. Niramuka itwaye iri rushanwa, bizaba ari ubwa mbere yegukanye UEFA Champions League mu mateka yayo.
