Imihanda mishya ijya ku Kibuga cy’Indege cya Bugesera igeze he?
Mu gihe imirimo yo kubaka Ikibuga Mpuzamahanga cy’Indege cya Bugesera ikomeje, imirimo yo kubaka imihanda ibiri mishya izajya igihuza n’Umujyi wa Kigali ndetse n’ahandi mu gihugu na yo yaratangiye. Muri iyo mihanda harimo uzaba ari Expressway, umuhanda wihariye uzajya ukoreshwa n’abawishyuye amafaranga y’urugendo.
Iyi mihanda yombi igamije koroshya ingendo z’abagana iki kibuga n’abakivaho, kunoza ubwikorezi no gufungura amahirwe mashya y’ubucuruzi n’ishoramari mu Karere ka Bugesera no mu bindi bice by’igihugu.
Ubusanzwe, imirimo yo kubaka umuhanda uva mu Karumuna ugana ku Kibuga Mpuzamahanga cy’Indege cya Bugesera iracyibanda ku gutegura ubutaka n’inzira uzanyuramo. Mu gihe iy’uwitwa Masaka-Kabukuba-Nyamata yo yamaze gutangira, nubwo hari ibice bitarakorwamo kubera imitungo y’abaturage itarishyurwa ngo yimurwe.
Umuhanda wo mu Karumuna uzaba ari Expressway
Umuhanda wa mbere uzahagurukira mu Karumuna, ahari muri metero 500 uvuye ku Kiraro cy’Akagera, ugakomeza ugana ku Kibuga Mpuzamahanga cy’Indege cya Bugesera. Uzakora intera y’ibilometero 11.
Uyu muhanda uzashamikira ku wa Kicukiro-Nyamata, ku buryo ibinyabiziga bizajya ku kibuga cy’indege cyangwa bikivaho bitazajya biba ngombwa ko binyura mu Mujyi wa Nyamata.
Amakuru atangwa n’Ikigo gishinzwe guteza imbere Ubwikorezi mu Rwanda (RTDA) agaragaza ko uyu muhanda uzaba ari Expressway, ni ukuvuga umuhanda wihariye ugenewe koroshya ingendo no gutuma ibinyabiziga biwunyuramo bigenda ku muvuduko uri hejuru. Abazajya bawukoresha bazajya bishyura amafaranga y’urugendo.
Uzaba amahitamo ku bagenzi bifuza kugera ku kibuga cy’indege mu gihe gito cyangwa kuhava badatinze, cyane cyane mu gihe indi mihanda isanzwe yaba irimo umuvundo w’ibinyabiziga.
Ikindi kiranga uyu muhanda ni uko uzaba ari inzira ngufi ugereranyije n’indi mihanda izajya ihuza iki kibuga cy’indege n’ahandi mu buryo buziguye. Ibi na byo biri mu mpamvu uzategurwa nk’umuhanda wihariye uzajya ukoreshwa hishyuwe.
Gusa, kuba uyu muhanda uzajya ukoreshwa hishyurwa ntibivuze ko indi mihanda yose izajya igana ku Kibuga cy’Indege cya Bugesera izaba isaba kwishyura.
Ubwo twasuraga ahari kubakwa uyu muhanda, twasanze imirimo muri rusange ikiri mu cyiciro cyo gutegura ubutaka no gutunganya inzira uzanyuramo, hakurikijwe igishushanyo mbonera cyawo.
Hari ibice bimwe imirimo yahagazeho by’agateganyo bitewe n’uko ubwo kubaka uyu muhanda byatangiraga, hari imitungo y’abaturage iri mu nzira uzanyuramo yari itarabariwe ngo ba nyirayo bahabwe ingurane kandi bimurwe.
Urugero ni mu ntera ya kilometero ebyiri uvuye aho umuhanda utangirira mu Karumuna. Muri icyo gice hari imitungo irimo inyubako z’uruganda rutunganya impu, ibiraro by’amatungo n’amazu y’abaturage bitari byishyurwa ngo byimurwe.
Mu gihe hakorwa ibiganiro bigamije kumvikana ku ngurane, imirimo muri icyo gice yahagaze by’agateganyo.
Iradukunda Eric, umukozi ushinzwe abakozi muri sosiyete ya China Road and Bridge Corporation, yatubwiye ko imirimo muri icyo gice igiye gukomeza kuko ibiganiro bigamije kwishyura no gutanga ingurane ku bafite imitungo isigaye bigeze kure.
Yavuze ko ibikoresho bizakoreshwa muri icyo gice na byo byatangiye kuhagera, bityo ko mu minsi ya vuba imirimo izakomeza mu bice byose by’uyu muhanda.
Iradukunda yasobanuye ko muri iki gihe ibikorwa byibanda ahanini ku gutegura inzira umuhanda uzanyuramo no gutunganya ubutaka hakurikijwe igishushanyo mbonera cyawo.
Yagize ati: “Ubu amamashini ari mu bikorwa byo gusiza kugira ngo tugere ku butaka umuhanda uzacaho. Hari n’aho bisaba ko tuzamura ubutaka kugira ngo buhure n’urwego umuhanda uteganyijwe kuzanyuraho. Abashinzwe gupima ubutaka bari mu kazi ko kugenzura imiterere yabwo, bakabihuza n’uko umuhanda uteganyijwe kuzaba umeze.”
Umuhanda Masaka-Kabukuba-Nyamata na wo watangiye kubakwa
Undi mushinga ni uw’umuhanda wa Masaka-Kabukuba-Nyamata, na wo uzagira uruhare mu guhuza Ikibuga cy’Indege cya Bugesera n’Umujyi wa Kigali ndetse n’ahandi mu Karere ka Bugesera.
Uyu muhanda uri muri gahunda y’imishinga y’ibikorwaremezo izwi nka Kigali Logistics Platform (KLP), igamije guhuza icyambu cyo ku butaka cya Dubai Port kiri i Masaka n’Ikibuga Mpuzamahanga cy’Indege cya Kigali, ndetse no koroshya uburyo ibi bikorwaremezo bizajya bihuzwa n’ibindi bice byo mu Ntara y’Iburasirazuba n’iy’Amajyepfo.
Igice cy’umuhanda wa Masaka-Kabukuba gifite uburebure bwa kilometero 16,88, mu gihe igice kizakomereza i Nyamata, kinyuze hafi y’ikibuga cy’indege, gifite kilometero 13,72.
Ubwo twasuraga ahari kubakwa uyu muhanda, twasanze imirimo irimbanije, nubwo hari ibice bimwe bitarakorwamo kubera imitungo y’abaturage itarishyurwa ngo yimurwe.
Bamwe mu baturage bafite imitungo iri mu nzira y’uyu muhanda bavuze ko bizeye guhabwa ingurane zabo mu gihe cya vuba, kuko amafaranga bagomba guhabwa bamaze kuyasinyira.
Umwe muri bo yagize ati: “Ubu ni ikibazo cy’igihe gusa kuko amafaranga twamaze kuyasinyira, twanatanze ibikenerwa byose harimo na konti azashyirwaho.”
RTDA ivuga ko iyi mihanda itazagira akamaro gusa mu kugeza abagenzi ku kibuga cy’indege, ahubwo ko izanafasha koroshya ubwikorezi no gufungura inzira nshya z’ubukungu n’ishoramari.
Abikorera batangiye kwitegura amahirwe mashya i Bugesera
Abikorera bo mu Karere ka Bugesera bagaragaza ko iyi mihanda mishya izafungura amahirwe menshi y’ubucuruzi n’ishoramari, bityo ko ari ngombwa ko batangira kuyategurira kugira ngo bazayabyaze umusaruro.
Bavuga ko bamwe mu bashoramari bamaze gutangira gushaka no kugura ubutaka mu bice iyi mihanda izanyuramo, mu rwego rwo kuzabyaza umusaruro urujya n’uruza rw’abantu n’ibicuruzwa ruziyongera.
Mu kiganiro cyihariye, Perezida w’Urugaga rw’Abikorera (PSF) mu Karere ka Bugesera, Dr. Munyaburanga Edouard, yabwiye itangazamakuru ko abikorera batangiye kureba ahantu hashobora kubakwa ibikorwa bitandukanye by’ubucuruzi, birimo amahoteli.
Yagize ati: “Icya mbere, ubu abantu batangiye kugura ubutaka. Bamwe bari kureba ahantu h’ingenzi bashobora kubaka, nk’amahoteli.”
Yagaragaje ko uretse imishinga y’iyi mihanda, hari n’indi mishinga minini iteganyijwe muri aka karere, irimo uwa Airport City, na wo watangiye kwitabwaho n’abikorera ndetse n’abaturage bashaka uko bazabyaza umusaruro amahirwe uzazana.
Yongeyeho ko ibi bigaragaza ko iterambere ry’ibikorwaremezo rishobora kuzana impinduka zirenze koroshya ingendo, rikongera ibikorwa by’ubucuruzi, serivisi n’ishoramari muri Bugesera.
Ikibuga cy’Indege cya Bugesera kizakira abagenzi miliyoni 14
Ikibuga Mpuzamahanga cy’Indege cya Bugesera kiri mu mishinga minini y’ibikorwaremezo u Rwanda rukomeje kubaka.
Mu cyiciro cya mbere, iki kibuga cyateganyijwe kwakira abagenzi bagera kuri miliyoni zirindwi n’imizigo ingana na toni ibihumbi 150 ku mwaka.
Gifite umuhanda indege zizajya zihagurukiraho zikanawugwaho ufite uburebure bwa metero 4.200.
Icyiciro cya kabiri cy’uyu mushinga giteganyijwe kurangira mu 2032, kikazongera ubushobozi bw’ikibuga cyo kwakira abagenzi ku mwaka bukagera kuri miliyoni 14.
Biteganyijwe ko iyi mihanda mishya izagira uruhare rukomeye mu koroshya imigendekere y’abantu n’ibicuruzwa, bityo ikaba imwe mu nkingi zizafasha mu kwihutisha iterambere ry’ubukungu n’ishoramari mu Karere ka Bugesera no mu gihugu muri rusange.
