Madamu Jeannette Kagame yifatanyije n’abandi banyacyubahiro n’abiganjemo urubyiruko mu gitaramo cy’ikinamico cyiswe ‘Carte d’identité’, cyateguwe na Ntarindwa Diogène uzwi nka Atome, kikagaruka ku mateka y’u Rwanda n’uruhare rw’urubyiruko mu rugamba rwo kubohora Igihugu.
Iki gitaramo cyabereye muri Kigali Convention Centre (KCC), ku mugoroba wo ku wa Gatandatu, tariki ya 7 Ugushyingo 2026, cyitabirwa n’abayobozi batandukanye barimo Minisitiri w’Urubyiruko n’Ubuhanzi, Dr. Utumatwishima Jean Nepo Abdallah; Minisitiri w’Uburezi, Dr. Gaspard Twagirayezu; na Minisitiri w’Ubumwe bw’Abanyarwanda n’Inshingano Mboneragihugu, Dr. Jean-Damascène Bizimana.
Atome ni we watangije igikorwa, aha ikaze abitabiriye anabasobanurira igitekerezo n’amavu n’amavuko y’umukino ‘Carte d’identité’ wari ugiye kwerekanwa.
Mbere yo kuwugezaho, yabanje gusogongeza abitabiriye igitaramo ku mushinga mushya yatangiye gutegura, ugamije kugaruka ku mateka y’urugamba rwo kubohora u Rwanda.
Uyu mushinga yawise ‘Legacy Project: Igitaramo cy’Inkotanyi’, akaba ateganya kuwumurikira Abanyarwanda mu 2027. Yavuze ko uzifashisha ubuhanzi, ikinamico n’indirimbo mu kwigisha amateka yo kubohora Igihugu, by’umwihariko urubyiruko.
Abitabiriye igitaramo banasogongejwe kuri ‘soundtrack’ y’uyu mushinga, igizwe n’indirimbo n’injyana bifitanye isano n’amateka y’urugamba rwo kubohora u Rwanda.
Atome yavuze ko igitekerezo cyo gukora ‘Carte d’identité’ yagishingiye ku buhamya bw’amateka ye bwite, anagamije kugaragaza uruhare rw’urubyiruko mu rugendo rwo kubohora Igihugu.
Uyu mukino w’ikinamico watambutse mu rurimi rw’Igifaransa, ugaruka ku bihe bitandukanye u Rwanda rwanyuzemo, amateka yarwo n’uruhare rw’Abanyarwanda mu rugendo rwo kubohora Igihugu. Mu bawugizemo uruhare harimo n’umuhanzi Ruti Joel.
Nyuma yo kwerekana umukino, hakurikiyeho ibindi bikorwa birimo ikiganiro nyunguranabitekerezo (Panel Discussion), cyahaye abitabiriye umwanya wo kungurana ibitekerezo ku butumwa n’amateka byagarutsweho muri iki gitaramo.
Atome ategura umushinga wo kwigisha amateka akoresheje ubuhanzi
Ntarindwa Diogène, uzwi nka Atome, ni umwe mu bahanzi nyarwanda bakoresha urwenya, ikinamico n’ubundi buryo bw’ubuhanzi mu gutanga ubutumwa no kugeza ku bantu ibitekerezo bitandukanye.
‘Carte d’identité’ ni umwe mu mishinga ye yibanda ku mateka y’u Rwanda. Umushinga mushya wa ‘Legacy Project: Igitaramo cy’Inkotanyi’ ateganya kumurika mu 2027 na wo uzibanda ku gukoresha ubuhanzi mu gusigasira no kugeza ku rubyiruko amateka y’urugamba rwo kubohora Igihugu
