Inama y’Abaminisitiri yateranye kuri uyu wa 8 Kamena 2026 muri Village Urugwiro iyobowe na Perezida wa Repubulika, Paul Kagame, yemeje ishyirwaho ry’Ikigo cy’Igihugu gishinzwe Ikoranabuhanga ry’Ubwenge Buhangano (Artificial Intelligence), kizafasha u Rwanda kwihutisha iterambere ry’ikoranabuhanga, guhanga udushya, gukurura ishoramari no guteza imbere ubukungu bushingiye ku bumenyi.
Icyemezo cyo gushinga iki kigo kiri mu ngamba z’u Rwanda zo gukomeza kwinjiza ikoranabuhanga mu nzego zitandukanye hagamijwe kongera umusaruro no guhangana ku rwego mpuzamahanga mu bukungu bushingiye ku ikoranabuhanga.
Ingengo y’imari ya 2026/2027 yemejwe
Inama y’Abaminisitiri yanasuzumye inemeza umushinga w’itegeko rigena ingengo y’imari ya Leta y’umwaka wa 2026/2027.
Iyi ngengo y’imari izibanda ku kongera umusaruro w’ubuhinzi, guteza imbere inganda, kwihutisha ihangwa ry’imirimo mishya no kubaka ubukungu butajegajega bushobora guhangana n’ihungabana ry’ubukungu ku rwego mpuzamahanga.
U Rwanda rwakajije ingamba zo kwirinda Ebola
Abaminisitiri banamenyeshejwe uko icyorezo cya Ebola gihagaze mu karere n’ingamba igihugu cyafashe zo kugikumira.
Minisiteri y’Ubuzima yatangaje ko yakajije ingamba zo gusuzuma no gukurikirana abinjira mu gihugu banyuze ku mipaka yose, hagamijwe kurinda abaturage icyorezo gikomeje kugaragara mu bihugu bimwe byo mu karere.
Guverinoma yagaragaje ko kugeza ubu nta murwayi wa Ebola uragaragara mu Rwanda, ndetse ibikorwa byose bikomeje nk’ibisanzwe. Abaturage bakaba basabwe gukomeza kubahiriza amabwiriza y’inzego z’ubuzima.
Amasezerano mpuzamahanga n’imishinga y’iterambere byemejwe
Inama y’Abaminisitiri yemeje kandi imishinga myinshi y’amategeko igamije kwemeza burundu amasezerano y’inguzanyo n’impano hagati y’u Rwanda n’abafatanyabikorwa batandukanye.
Muri ayo masezerano harimo ayerekeye:
- Inguzanyo z’inyongera zigenewe gahunda y’iterambere rikomatanyije rishingiye ku ikoreshwa ry’amazi y’ Umuvumba.
- Inkunga n’inguzanyo zigenewe icyiciro cya kabiri cy’umushinga wo gufasha impunzi n’imiryango yazakiriye.
- Inguzanyo zigamije kunoza uburyo bwo gutwara abantu n’ibintu mu mijyi.
- Inguzanyo yo gushyigikira gahunda yo guhangana n’ibiza no gutegura uburyo bwo kubona amafaranga yihutirwa mu gihe habaye ibiza.
- Amasezerano hagati y’u Rwanda na Botswana agamije guca burundu ikibazo cyo gusoresha kabiri no kurwanya inyerezwa ry’imisoro.
- Amasezerano y’ubwikorezi bwo mu kirere hagati y’u Rwanda n’ibihugu birimo Algeria, Azerbaijan, Botswana, Costa Rica, Guyana, Maroc, Sénégal, Trinidad and Tobago ndetse n’Ubwami bw’Abongereza na Irlande y’Amajyaruguru.
Abaminisitiri banemeje amasezerano ashyiraho Ikigo Nyafurika gifasha mu gukumira no guhangana n’ibiza kizwi nka Africa Risk Capacity (ARC) Agency.
Zipline yahawe ubutaka muri Karongi
Mu byemezo byafashwe harimo no gukodesha ubutaka bwa Leta buri mu Karere ka Karongi sosiyete Zipline Rwanda Ltd, ikomeje gutanga serivisi zifashisha drones mu kugeza ibikoresho by’ubuvuzi n’amaraso aho bikenewe.
Hanemejwe itangwa ry’impushya zo gucukura amabuye y’agaciro na kariyeri.
Abahagarariye imiryango n’ibihugu by’amahanga bemejwe
Inama y’Abaminisitiri yemeje kandi abahagarariye ibihugu n’imiryango mpuzamahanga mu Rwanda, barimo:
- Jérémie Blin, Ambasaderi w’Umuryango w’Ubumwe bw’u Burayi (EU) mu Rwanda.
- Dr. Simone Knapp, Ambasaderi wa Austria mu Rwanda ufite icyicaro i Nairobi.
- Dede Ekoue, uhagarariye Ikigega Mpuzamahanga gitsura Amajyambere mu Buhinzi (IFAD) mu Rwanda.
Abayobozi bashya bashyizwe mu myanya
Inama y’Abaminisitiri yanashyize mu myanya abayobozi batandukanye mu nzego zirimo Urwego rushinzwe kugenzura iyubahirizwa ry’uburinganire (GMO), Urwego rw’Iterambere mu Rwanda (RDB), Urwego rw’Igihugu rw’Imiyoborere (RGB) ndetse n’Ikigo gishinzwe Amashuri Makuru (HEC).
Muri bo harimo Habiyaremye Rurihose Florien wongerewe manda nk’Umugenzuzi Mukuru wa Gender Wungirije ushinzwe iyubahirizwa ry’uburinganire, ndetse n’abandi bayobozi bashyizwe mu nzego zitandukanye za Leta.
Kigali International Peace Marathon igiye kuba ku nshuro ya 21
Mu bindi byagejejwe ku Nama y’Abaminisitiri, Minisitiri wa Siporo yatangaje ko kuva ku wa 13 kugeza ku wa 14 Kamena 2026, mu Rwanda hazabera Kigali International Peace Marathon ku nshuro ya 21.
Ni isiganwa mpuzamahanga rimaze kuba kimwe mu bikorwa bya siporo bikomeye byitabirwa n’abakinnyi baturutse hirya no hino ku Isi.
Ku rundi ruhande, Minisitiri w’Ibidukikije yatangaje ko u Rwanda ruzakira Inama ya 38 y’Ibihugu byasinye Amasezerano ya Montreal kuva ku wa 2 kugeza ku wa 6 Ugushyingo 2026, bikaba biteganyijwe ko izitabirwa n’abahagarariye ibihugu byinshi byo ku Isi.
Ibyemezo byafatiwe muri iyi Nama y’Abaminisitiri bigaragaza icyerekezo cya Guverinoma cyo gukomeza guteza imbere ubukungu bushingiye ku ikoranabuhanga, kongera ishoramari, kurinda ubuzima bw’abaturage no gukomeza guteza imbere imikoranire mpuzamahanga.
