Perezida w’u Rwanda, Paul Kagame, yashimye Arsenal umufatanyabikorwa wa gahunda ya Visit Rwanda, nyuma yo kwegukana Igikombe cya Shampiyona y’u Bwongereza cya 2025/2026.
Arsenal F.C. yegukanye iki gikombe ku wa 19 Gicurasi 2026, nyuma y’uko AFC Bournemouth inganyije na Manchester City F.C. igitego 1-1. Byatumye Manchester City iguma ku manota 78, irushwa ane na Arsenal ifite 82, kandi amakipe yombi asigaje umukino umwe gusa wa shampiyona.
Mu butumwa Perezida Kagame yanyujije ku rubuga rwa X, yagize ati: “Mwishyuke Arsenal, umufatanyabikorwa wacu wa Visit Rwanda, kuba mwegukanye Igikombe cya Shampiyona [Premier League] nyuma y’umwaka w’imikino waranzwe no guhatana cyane. Igikombe mugitwaye mubikwiye.”
Arsenal yari imaze imyaka 22 itegukana iki gikombe, kuko yaherukaga kugitwara mu mwaka w’imikino wa 2003/2004 ubwo yasozaga shampiyona idatsinzwe umukino n’umwe. Ni ku nshuro ya kane itwaye Premier League kuva yahindura izina mu 1992, nyuma y’izo yatwaye mu 1997/98, 2001/02 na 2003/04. Muri rusange, imaze gutwara ibikombe bya shampiyona y’u Bwongereza 14.
Ubufatanye hagati ya Arsenal n’u Rwanda bwatangiye mu 2018, aho iyi kipe yamamaza ubukerarugendo bw’u Rwanda binyuze muri gahunda ya Visit Rwanda iri ku myambaro yayo no muri stade yayo. Abakinnyi n’abayobozi b’iyi kipe kandi bagiye basura u Rwanda mu bihe bitandukanye.
Gusa ubu bufatanye buzarangira uyu mwaka w’imikino wa 2025/2026, aho Arsenal izasoza Premier League yakira Crystal Palace F.C. ku Cyumweru Saa 17:00.
Arsenal kandi iracyafite amahirwe yo gukomeza kwandika amateka, kuko ifitanye umukino ukomeye na Paris Saint-Germain F.C. muri UEFA Champions League, aho kuyegukana byaba ari ubwa mbere mu mateka yayo.
Arsenal F.C. yegukanye Igikombe cya Shampiyona y’u Bwongereza, Premier League, nyuma y’imyaka 22 idatwara iri rushanwa. Ni nyuma y’uko Manchester City F.C. inganyije na AFC Bournemouth igitego 1-1.
Kuri uyu wa Kabiri, tariki ya 19 Gicurasi 2026, ni bwo Manchester City yakinnye umukino wayo w’Umunsi wa 37 wa Premier League wabereye kuri Vitality Stadium imbere y’abafana barenga ibihumbi 11.
AFC Bournemouth yafunguye amazamu ku munota wa 39 ku gitego cyatsinzwe na Eli Junior Kroupi, mbere y’uko Manchester City ishaka kwishyura kugeza ibonye igitego ku munota wa gatanu w’inyongera cyinjijwe na Erling Haaland.
Kunganya uyu mukino byatumye Manchester City itozwa na Pep Guardiola igira amanota 78, irushwa amanota ane na Arsenal mu gihe hasigaye umukino umwe gusa wa shampiyona
