Barcelona yatsinze Real Madrid mu minota y’inyongera, yegukana igikombe cya Copa del Rey
Ikipe ya FC Barcelona yegukanye igikombe cya Copa del Rey ku nshuro ya 32 nyuma yo gutsinda Real Madrid ibitego 3-2, mu mukino wahuje aya makipe yombi kuri Stade ya La Cartuja i Seville, kuri uyu wa 26 Mata 2025.
Ni intsinzi ya mbere umutoza Hansi Flick atwaye ari kumwe na FC Barcelona, ndetse iyi kipe ikomeje urugendo rwo gushaka kwegukana ibikombe bine (quadruple) muri uyu mwaka.
Pedri yafunguye amazamu ku ruhande rwa Barcelona ku munota wa 28, atsinda igitego cyiza nyuma y’ubufatanye bwiza na Pau Cubarsi ndetse na Lamine Yamal. Gusa Real Madrid yaje kugaruka mu mukino mu gice cya kabiri, aho Kylian Mbappe yishyuriye ku ikosa ryatewe ku mupira wari kuri coup-franc, hanyuma Aurelien Tchouameni atsinda igitego cya kabiri ku mutwe ku munota wa 77
Barcelona ntiyacitse intege, kuko Ferran Torres yatsinze igitego cyo kwishyura ku munota wa 84, ku mupira mwiza yahawe na Lamine Yamal, bituma umukino ujya mu minota y’inyongera.
Mu minota y’inyongera, Jules Kounde yatsinze igitego cy’intsinzi ku ruhande rwa Barcelona, nyuma yo gufata umupira wari utanzwe nabi na Luka Modric, agatsinda n’ishoti rikomeye rikomeye riri hanze y’urubuga rw’amahina.
Real Madrid yasoreje umukino iri mu gahinda, kuko myugariro wayo Antonio Rudiger yahawe ikarita itukura nyuma yo gutera ikintu mu kibuga kigana ku musifuzi.
Muri uyu mukino, Real Madrid kandi yaburiye Ferland Mendy kubera imvune, naho Kylian Mbappe wari watangiye ku ntebe y’abasimbura kubera imvune y’akagombambari, yinjiye mu kibuga mu gice cya kabiri agira uruhare rukomeye mu gusatira izamu rya Barcelona.
Nubwo Real Madrid yagerageje kugaruka, Barcelona yarushije cyane ibifashijwemo na Lamine Yamal wagaragaje ubuhanga buhanitse ndetse na Pedri wabaye umutima w’ikipe hagati mu kibuga.
Aya makipe yombi azongera guhura muri Gicurasi muri shampiyona ya LaLiga, mu mukino ushobora guhitamo igikombe cy’uyu mwaka.
