Abasirikare 254 bo mu Ngabo za Repubulika ya Centrafrique (FACA), barimo ba ofisiye n’abasirikare bafite andi mapeti, basoje imyitozo y’ibanze mu bikorwa bya gisirikare bidasanzwe yari imaze amezi atandatu, itangwa n’Ingabo z’u Rwanda (RDF).
Umuhango wo gusoza iyi myitozo wabaye ku wa 2 Ugushyingo 2026, mu Kigo cya Gisirikare cya Nasho, giherereye mu Karere ka Kirehe, uyoborwa n’Umugaba Mukuru w’Ingabo z’u Rwanda, Gen MK Mubarakh, ari kumwe na mugenzi we wa Centrafrique, Gen Zephirin Mamadou.
Uyu muhango kandi witabiriwe n’abajenerali n’abandi ba ofisiye bakuru bo mu ngabo z’ibihugu byombi.
Iyi myitozo yari igamije kongerera abasirikare ba FACA ubumenyi n’ubushobozi bwo gukora ibikorwa bya gisirikare bidasanzwe, binyuze mu myitozo ibatoza ikinyabupfura, ubunyamwuga n’ubushobozi bwo gusohoza inshingano mu bihe n’ahantu bigoye.
Mu ijambo rye, Umugaba Mukuru w’Ingabo z’u Rwanda, Gen MK Mubarakh, yashimiye abasirikare 254 barangije iyi myitozo ku murava, ikinyabupfura, ubudaheranwa n’ubwitange bagaragaje mu gihe cy’amezi atandatu bamaze mu myitozo.
Yabashishikarije gukomeza kurangwa n’ubunyamwuga batojwe, gukorera igihugu cyabo babyitangiye no gukoresha neza ubumenyi n’ubushobozi bungutse.
Yongeye gushimangira ubushake bwa RDF bwo gusangiza ingabo z’ibihugu by’inshuti ubunararibonye n’ubumenyi ifite, mu rwego rwo gukomeza ubufatanye bugamije kwimakaza amahoro, umutekano n’ituze ku mugabane wa Afurika.
Ku ruhande rwa Centrafrique, Umugaba Mukuru w’Ingabo z’icyo gihugu, Gen Zephirin Mamadou, yashimiye Guverinoma y’u Rwanda, ubuyobozi bwa RDF n’abatoza bagize uruhare muri iyi myitozo, abashimira ubwitange, ubunyamwuga n’umurava bagaragaje.
Yavuze ko ubumenyi, ikinyabupfura n’ubushobozi abasirikare ba FACA bungutse bizabafasha kurushaho gusohoza inshingano zabo no kugira uruhare mu kubungabunga umutekano n’ituze muri Repubulika ya Centrafrique.
Sous-Lieutenant Christ Ngboundourou, umwe mu basirikare basoje iyi myitozo, na we yagaragaje ko yiyemeje gushyira mu bikorwa ubumenyi yungukiye mu Rwanda kugira ngo arinde igihugu cye n’abaturage bacyo.
Mu gihe cy’amezi atandatu, abasirikare bitabiriye iyi myitozo bahawe ubumenyi butandukanye burimo kurasa ku ntego hakoreshejwe intwaro nto n’izifashishwa mu gushyigikira ibikorwa by’urugamba, kurwana intoki, kwambuka imigezi n’andi mazi, gusoma amakarita ya gisirikare ndetse no gukora ibikorwa bya gisirikare hifashishijwe kajugujugu.
Isozwa ry’iyi myitozo ni intambwe mu kongerera ubushobozi n’ubunyamwuga abasirikare ba FACA. Rinashimangira ubufatanye hagati y’u Rwanda na Repubulika ya Centrafrique mu bijyanye n’ibya gisirikare, by’umwihariko mu bijyanye n’amahugurwa, kongerera ubushobozi abasirikare no guteza iimbere ubunyamwuga bw’ingabo z’ibihugu byombi
