Kiyovu Sports yatsinze Gasogi United ibitego 2-0, isubira mu makipe ane ya mbere muri Shampiyona y’Icyiciro cya Mbere mu Rwanda.
Uyu mukino w’Umunsi wa 26 wa Rwanda Premier League wabereye kuri Kigali Pelé Stadium kuri uyu wa Gatanu, tariki ya 3 Mata 2026.
Wari umukino wa mbere Kiyovu Sports ikinnye idafite umutoza Haringingo Francis uherutse kwerekeza muri mukeba Rayon Sports, mu gihe ibijyanye no gutandukana kwabo bikiri mu manza.
Kuri uyu mukino, Kiyovu Sports yatozwaga by’agateganyo na Sebarera Ayubu Khaliru usanzwe ari umutoza wungirije, aho nta mpinduka nini yakoze mu bakinnyi basanzwe babanza mu kibuga.
Mu gice cya mbere, Kiyovu Sports yatangiye isatira ishaka igitego kare. Uwineza René yazamukanye neza ku ruhande rw’iburyo, ahindura umupira mu rubuga rw’amahina usanga Uwiyaremye Fidali awuteye atawuhagaritse, ariko uca iruhande rw’izamu.
Sandja Bulaya na we yagerageje ishoti rikomeye, ariko umupira uca hejuru y’izamu gato, mu gihe Rukundo Abdourahmani na we yinjiranye umupira mu rubuga rw’amahina awutera ku ruhande.
Igitego cya mbere cyabonetse ku munota wa 60, aho Rukundo Abdourahmani yatsindiye Kiyovu Sports nyuma y’umupira wari uvuye kuri Kazindu Guy awukuyemo nabi, akomotse ku ishoti rikomeye rya Sandja Bulaya.
Mu minota ya nyuma y’umukino, Kiyovu Sports yakomeje gusatira ishaka gushimangira intsinzi. Ku munota wa 87, Uwiyaremye Fidali yatsinze igitego cya kabiri, asiga ba myugariro ba Gasogi United aroba umunyezamu Ndagijimana Léandre, nyuma yo guhabwa umupira mwiza na Bukuru Christophe.
Iyi ntsinzi yatumye Kiyovu Sports igira amanota 42 ifata umwanya wa kane, irushwa amanota 12 na Al-Hilal SC ya mbere ku rutonde.
Ku ruhande rwa Gasogi United, iyi kipe yahise iguma ku mwanya wa 12 n’amanota 26, aho irusha amanota atanu gusa umurongo utukura, ndetse inahagarika umusaruro yari imaze imyaka itanu idatsindwa na Kiyovu Sports.
