Umugaba w’Ikirenga w’Ingabo z’u Rwanda, Nyakubahwa Perezida Paul Kagame, yagize Brig Gen Patrick Karuretwa Umuvugizi mushya w’Ingabo z’u Rwanda (RDF), asimbuye Brig Gen Ronald Rwivanga.
Mu itangazo ryashyizwe ahagaragara n’Ingabo z’u Rwanda (RDF) kuri uyu wa 17 Kamena 2026, hatangajwe ko Brig Gen Karuretwa azakomeza no gukora inshingano ze nk’Umuyobozi Mukuru ushinzwe ubufatanye mpuzamahanga mu bya gisirikare muri Minisiteri y’Ingabo.
Brig Gen Karuretwa asimbuye Brig Gen Ronald Rwivanga uherutse guhabwa inshingano nshya zo kuyobora umutwe w’Ingabo z’Umuryango wa Afurika y’Iburasirazuba (EACRF) ushinzwe ibikorwa byo gutabara aho rukomeye.
Brig Gen Patrick Karuretwa yinjiye mu gisirikare mu mwaka wa 1992, mu gihe cy’urugamba rw’Ingabo za RPA-Inkotanyi rwo kubohora u Rwanda. Icyo gihe yari afite imyaka 18 y’amavuko.
Mu rwego rw’amashuri, yize amategeko muri Kaminuza y’u Rwanda mu mwaka wa 2000, nyuma akomereza amasomo muri The Fletcher School at Tufts University muri Leta Zunze Ubumwe za Amerika, aho yakuye impamyabumenyi y’icyiciro cya gatatu (Master’s Degree) mu mategeko mpuzamahanga.
Hagati ya 2008 na 2009, yanize amasomo ajyanye n’umutekano mpuzamahanga ndetse n’umutekano wa muntu muri iyo kaminuza.
Nyuma yo kurangiza ayo masomo, yamaze imyaka irenga 10 akorera muri Perezidansi ya Repubulika ku myanya itandukanye. Muri iyo myaka, yabaye Umujyanama wa Perezida wa Repubulika mu by’umutekano kuva mu mwaka wa 2011 kugeza muri Werurwe 2016.
Kuva mu Ugushyingo 2013 kugeza muri Nyakanga 2021, Brig Gen Karuretwa yanabaye Umunyamabanga wihariye wa Perezida wa Repubulika.
Mu Ukuboza 2024, yagizwe Perezida w’Urukiko Rukuru rwa Gisirikare, inshingano yafatanyaga n’izo kuyobora ishami rishinzwe ubufatanye mpuzamahanga mu bya gisirikare muri Minisiteri y’Ingabo.
Ishyirwaho rya Brig Gen Karuretwa ku mwanya w’Umuvugizi wa RDF rije ryiyongera ku zindi nshingano zikomeye amaze imyaka myinshi akorera mu nzego z’umutekano n’ubuyobozi bw’Igihugu.
