Abakinnyi b’Amavubi batangiye kugera mu mwiherero wo kwitegura Tanzania na Comores
Abakinnyi b’Ikipe y’Igihugu y’u Rwanda, Amavubi, batangiye kugera mu mwiherero uzabera i Marrakesh mu gihugu cya Maroc, aho bitegura imikino mpuzamahanga ya gicuti bazahuramo na Tanzania ndetse na Comores mu minsi iri imbere.
Uyu mwiherero watangiye kuri uyu wa 1 Kamena 2026, ukaba uri muri gahunda yo gukomeza gutegura neza ikipe y’Igihugu mbere y’imikino ikomeye iyitegereje mu mezi ari imbere. Amavubi azabanza gukina na Comores ku wa 6 Kamena mbere yo guhura na Tanzania ku wa 9 Kamena 2026, imikino yose ikazabera i Marrakesh muri Maroc.
Umutoza mukuru w’Amavubi, Stephen Constantine, yahamagaye abakinnyi 24 bagomba kwitabira uyu mwiherero, barimo bamwe basanzwe bakinira ikipe y’Igihugu ndetse n’abakinnyi bashya bafite intego yo kongerera imbaraga Amavubi. Muri bo harimo na Noam Fritz Emeran, wahoze mu akademi ya Manchester United, uhamagawe bwa mbere mu Ikipe y’Igihugu y’u Rwanda. (InyaRwanda)
Iyi mikino ya gicuti izafasha abatoza gusuzuma urwego rw’abakinnyi, kugerageza amayeri atandukanye ndetse no kongerera ikipe ubunararibonye mbere yo gutangira urugendo rwo guhatanira itike y’Igikombe cya Afurika cy’Ibihugu cya 2027.
Amavubi arimo kwitegura imikino yo gushaka itike y’Igikombe cya Afurika cy’Ibihugu, AFCON 2027, kizabera mu bihugu bitatu byo muri Afurika y’Iburasirazuba ari byo Kenya, Tanzania na Uganda. Ubuyobozi bwa FERWAFA n’abatoza b’Amavubi bizeye ko uyu mwiherero n’iyi mikino ya gicuti bizafasha ikipe kugera ku rwego rwiza mbere y’itangira ry’amajonjora.
Abakunzi b’umupira w’amaguru mu Rwanda bakomeje gukurikiranira hafi imyiteguro y’Amavubi, bizeye ko iyi kipe izitwara neza mu mikino ya gicuti ndetse no mu marushanwa atandukanye ayitegereje.
