Ubuyobozi bw’Akarere ka Rutsiro bwatangaje ko muri gahunda y’Igihugu yo kwihutisha iterambere (NST1), hubatswe hoteli nshya 18, ziyongera ku ebyiri zari zisanzwe, bituma aka karere kagira hoteli 20 zose hamwe.
Izi hoteli zose hamwe zifite ibyumba 213, ibintu bigaragaza uko Akarere ka Rutsiro kari kubyaza umusaruro amahirwe yihariye gafite yo kwiharira 50% by’amazi y’Ikiyaga cya Kivu, bigatuma karushaho kwigaragaza nk’ahantu hakwiye gushorwamo imari mu bukerarugendo.
Hoteli na lodge zubatse muri aka karere ziganje cyane mu mirenge itandukanye irimo Boneza, Ruhango, Mushubati, Gihango na Kigeyo. Umurenge wa Boneza ni wo uyoboye mu kwakira ishoramari ry’amahoteli, aho habarurwa hoteli zirimo Palega Beach Inn, Rushel Kivu Lodge, Amara Kivu Beach Hotel, Boneza Paradise Lodge n’izindi zubatse ku nkombe z’Ikiyaga cya Kivu.
Mu yindi mirenge, harimo hoteli nka Kivu Belt Hotel – Rutsiro, Kivu View Resort Rutsiro, Gishwati Lodge iri hafi ya Pariki ya Gishwati–Mukura, ndetse n’amalodge atandukanye akomeje kwiyongera hagamijwe kwakira ba mukerarugendo basura aka gace.
Muri izi hoteli, ebyiri ni zo zubatswe mbere ya 2017, zirimo imwe yo mu Murenge wa Mushubati isanzwe ari iya Leta y’Akarere n’indi iri mu Murenge wa Boneza izwi nka Rushel Kivu Lodge, ya Nyiramirimo Odette, ari na yo ifite icyumba gihenze muri aka Karere, cyishyurwa amadolari 200 ya Amerika ku ijoro.
Ubuyobozi bw’Akarere ka Rutsiro buvuga ko iri terambere ry’amahoteli riri mu murongo wa politiki y’Igihugu yo guteza imbere ubukerarugendo bushingiye ku bidukikije, amazi n’amashyamba. Umuyobozi w’ishami ry’ubucuruzi n’iterambere ry’umurimo mu Karere ka Rutsiro, Ndungutse Eugene, yavuze ko muri NST2 bafite umuhigo wo kongeramo izindi hoteli enye mu Murenge wa Boneza.
Ati: “Iterambere mu bijyanye n’amahoteli ririvugira.
Kugera mu 2029 hazaba hubatswe izindi nshya enye muri Boneza, kuko akarere kacu gafite amahirwe menshi y’ishoramari arimo amazi y’Ikiyaga cya Kivu, Pariki ya Gishwati–Mukura n’ubwiza nyaburanga bikurura ba mukerarugendo.”
Urwego rw’ubukerarugendo rukomeje kugaragaza umuvuduko mu iterambere. Imibare igaragaza ko mu mwaka wa 2024/2025, u Rwanda rwakiriye abashyitsi barenga miliyoni 1.15, ubukerarugendo bwinjirije igihugu miliyoni 649 z’amadolari ya Amerika, intego ikaba uko ayo mafaranga agomba kugera kuri miliyari imwe y’amadolari mu 2029.
Imibare y’Ishami ry’Ubukerarugendo mu Rugaga rw’Abikorera (PSF) igaragaza ko umubare w’ibyumba by’amahoteli mu Rwanda wageze ku bihumbi 25 mu 2024, mu gihe hateganyijwe kugera ku bihumbi 35 mu myaka ine iri imbere, ibintu byitezweho guteza imbere ubukungu n’imirimo hirya no hino mu gihugu.
