Iki gitaramo uyu muhanzi azakorera mu Bubiligi cyateguwe na Team Production, kikazaba ku wa Gatandatu tariki ya 4 Mata 2026, kikaba giteganyijwe nk’igitaramo cyihariye (Live Concert) kizibanda ku ndirimbo zaranze urugendo rurerure rwa Alexis Dusabe mu kuramya Imana, ndetse n’izindi nshya yagiye asohora mu bihe bitandukanye.
Alexis Dusabeni ni umwe mu bahanzi bamaze kubaka izina mu muziki wo kuramya no guhimbaza Imana akaba azahurira ku rubyiniro n’abandi bahanzi bakunzwe mu ndirimbo zo kuramya no guhimbaza Imana, barimo Tracy Agasaro n’umugabo we René Patrick, bazafatanya kumushyigikira muri iki gitaramo cyitezweho guhuriza hamwe Abanyarwanda n’inshuti zabo batuye mu Bubiligi n’ibihugu bituranye nabwo.
Uyu muhanzi w’indirimbo zo kuramya no guhimbaza Imana, Alexis Dusabe, akomeje imyiteguro yo gutaramira abakunzi be batuye ku Mugabane w’u Burayi, mu gitaramo gikomeye “Umuyoboro 25 Live Concert” kizabera mu Mujyi wa Bruxelles mu Bubiligi, kigamije kwizihiza imyaka 25 ishize ari mu muziki wa ‘Gospel’.
Ni igitaramo kije gikurikira urugendo rurerure rw’imyaka 25 Alexis Dusabe amaze mu muziki wa Gospel, aho yagiye asohora indirimbo zafashije benshi mu by’iyobokamana, izo ndirimbo zikaba zaramuhesheje izina rikomeye mu Rwanda no mu mahanga bityo akaba yifuza gusangiza abatuye i Burayi uyu muhamagaro.
Mu gitaramo aherutse gukorera mu rwa mubyaye { u Rwanda } uyu muhanzi yaririmbye izindi ndirimbo ze zakunzwe zirimo “Ibyiringiro”, “Umuyoboro’’ n’izindi nyinshi zatumye yubaka izina mu buryo bukomeye. Uyu muhanzi asoza yashimiye abantu bose bamubaye hafi muri iyi myaka yose amaze akora umuziki.
Igitaramo cya Alexis Dusabe cyitabiriwe n’abarimo Israel Mbonyi, Jado Sinza, Fabrice na Maya, Miss Aurore Kayibanda, Massamba Intore, Aline Gahonganyire, Papi Clever na Dorcas, Muyoboke Alex, Irené Merci Manzi wamenyekanye afasha abahanzi na Prosper Nkomezi.
Hari kandi Bobo Bonfils, Rev. Alain Numa, Prof. Bishop Masengo n’umugore we Pastor Solange Masengo, Denyse Mpambara, Tonzi, Pamela Mudakikwa, Dominic Ashimwe, Pastor Richard Ngendakuriyo n’abandi batandukanye.
Abategura iki gitaramo kigiye kubera i Burayi, bagaragaje ko kizaba umwanya mwiza wo gushimira Imana ku byo yakoze mu buzima bwa Alexis Dusabe, ndetse no gusangira n’abafana be umunezero w’uru rugendo rwe rw’imyaka 25, binyuze mu ndirimbo, ubuhamya n’ibihe byihariye byo kuramya.
Iki gitaramo cya Alexis Dusabe i Bruxelles kitezweho kuba kimwe mu bikorwa bikomeye bya Gospel bizabera mu Bubiligi mu mwaka wa 2026 kizabakandi kirimo abandi bahanzi nka Agasaro Tracy n’umugabo we René Patrick biteganyijwe ko bazagera mu Bubiligi taliki ya 1 Mata 2026 kugira ngo bitegure neza iki gitaramo.
Alexis Dusabe yateguje igitaramo abatuye i Burayi
