Ni umukino watangiranye imbaraga nyinshi ku ruhande rwa Rayon Sports wabonaga irimo kwataka ishaka uko yatsinda igitego. Amahirwe ya mbere Rayon Sports yayabonye ku munota wa 2 gusa, Fall Ngagne awuteye uca hanze gato y’izamu.
Ku munota wa 7, ikipe ya Rayon Sports yabonye igitego cya mbere gitsinzwe na Tambwe Gloire. Ni umupira Vigninou yahaye Ben Aziz Dao azamuka yihuta cyane ahereza Tambwe Gloire atereka mu izamuka nta gihunga.
Ku munota wa 18, ikipe ya Al Merrikh SC yabonye amahirwe akomeye ku mupira mwiza wazamukanwe na Aboubacar Bachir atera Santire nziza umupira ukurwamo na Mugisha Yves abasore ba Rayon Sports bahita bakuraho bihuta cyane.
Ku munota wa 32, Rayon Sports yatsinze igitego cya Kabiri gitsinzwe na Faustin Kitoko Likau Pizzaro ku mupira mwiza yari ahawe na Ndikumana Asmane awufunga neza ari mu rubuga rw’umuzamu ateye ishoti umuzamu wa Al Meriekh SC kuwukiramo umurusha imbaraga.
Ikipe ya Rayon Sports yasoje igice cya mbere yatsinze Al Merrikh SC ibitego 2-0. Ni igice Rayon Sports yakinnye neza bitandukanye ni uko byari bimeze mu minsi ishize.
Ku munota wa 49, Al Merrikh SC yatsinze igitego cya mbere cyo kwishyura gitsinzwe na Aboubacar Bachir wacenze ba myugariro ba Rayon Sports abaca mu ruhumye yisanga ari kumwe n’umuzamu wenyine atsinda igitego cya mbere.
Ku munota wa 64, ikipe ya Rayon Sports yakoze impinduka Bruno Ferry akuramo rutahizamu Fall Ngagne yinjizamo Sindi Paul Jesus.
Ku munota wa 87, ikipe ya Al Merrikh SC yatsinze igitego cya Kabiri cyo kwishyura ku mupira mwiza watewe na Faisal Ishag, maze Mugisha Yves kugira icyo akora biranga igitego kiba kirinjiye.
Umukino wahuzaga Rayon Sports na Al Merrikh SC, warangiye ikipe zombi zinganyije ibitego 2-2. Ni igice cya mbere Rayon Sports yakinnye neza ariko umutoza wa Al Meriekh agaruka akora impinduka arusha Rayon Sports umukino urangira ibitego byombi ibyishyuwe.
