Umunya-Slovenia Tadej Pogacar yongeye kwandika amateka mu mukino w’amagare, yegukana umudali wa Zahabu mu isiganwa ryo mu muhanda ry’abagabo muri Shampiyona y’Isi y’Amagare 2025 yasorejwe i Kigali ku Cyumweru, tariki ya 28 Nzeri 2025. Ni ku nshuro ya kabiri yikurikiranya abasha gutsinda iri rushanwa, nyuma y’intsinzi yabonye i Zurich mu 2024.
Pogacar w’imyaka 27 yakoresheje amasaha atandatu, iminota 21 n’amasegonda 20 ku ntera y’ibilometero 267,5. Yabashije gusiga abandi ubwo yavaga mu gikundi hasigaye ibilometero 104, akomeza ari imbere kugeza asoje isiganwa. Umubiligi Remco Evenepoel, wari wamukojeje isoni mu isiganwa ryo kwihuta (Time Trial) ryabereye i Kigali mu ntangiriro z’iyi Shampiyona, yarangije ku mwanya wa kabiri asizwe umunota umwe n’amasegonda 28, mu gihe Umunya-Irlande Ben Healy yegukanye umwanya wa gatatu asizwe iminota ibiri n’amasegonda 16.
Mu bakinnyi 165 batangiye, hasoje 30 gusa, birimo n’Abanyarwanda batandatu batashoboye gusoza urugendo.
Umuhango wo gusoza iri rushanwa ryamaze iminsi umunani wabereye mu Mujyi wa Kigali witabiriwe na Perezida Paul Kagame, ari kumwe na Perezida w’Ishyirahamwe ry’Umukino w’Amagare ku Isi (UCI), David Lappartient, n’Igikomangoma Albert II wa Monaco. Perezida Kagame ni we wambitse umudali wa Zahabu Tadej Pogacar, agaragaza agaciro u Rwanda ruha uyu mukino ndetse n’intsinzi yo kuba rwakiriye Shampiyona y’Isi ku nshuro ya mbere.
Uko ibihugu byakurikiranye mu kwegukana imidali:
1. U Buholandi (2 Zahabu, 1 Feza, 1 Umuringa)
2. U Bwongereza (2 Zahabu)
3. U Bufaransa (1 Zahabu, 2 Feza, 1 Umuringa)
4. U Busuwisi (1 Zahabu, 1 Feza, 2 Umuringa)
5. Espagne (1 Zahabu, 1 Feza, 2 Umuringa)
6. U Bubiligi (1 Zahabu, 1 Feza, 2 Umuringa)
7. U Butaliyani (1 Zahabu, 1 Feza, 1 Umuringa)
8. Australia (1 Zahabu, 1 Feza)
9. Canada (1 Zahabu)
10. Slovenia (1 Zahabu)
11. Suede(1 Zahabu)
12. Nouvelle-Zélande (2 Feza)
13. Slovakia (2 Feza)
14. Leta Zunze Ubumwe za Amerika (1 Feza)
15. Irlande (1 Umuringa)
16. Autriche (1 Umuringa)
17. Pologne (1 Umuringa)
18. Norvège (1 Umuringa)
Shampiyona y’Isi y’Amagare y’umwaka utaha izabera i Montréal muri Canada.
