BREAKING

AmakuruPolitiki

Perezida Kagame yakiriye Perezida Chapo wa Mozambique

Kuri uyu wagatatu tariki 27 Kanama 2025 Perezida Paul Kagame yakiriye mu biro bye Daniel Francisco Chapo, Perezida wa Mozambique waje mu Rwanda  mu ruzinduko rw’iminsi ibiri

Abakuru b’ibihugu bagiranye ibiganiro mu muhezo, byerekeye ubufatanye busanzwe hagati y’u Rwanda na Mozambique mu nzego zitandukanye.

Perezida Chapo yageze mu Rwanda ku gicamunsi cyo kuri uyu wa 27 Kanama, yakirwa ku kibuga mpuzamahanga cy’indege cya Kigali n’abayobozi barimo Umunyamabanga wa Leta muri Minisiteri y’Ububanyi n’Amahanga n’Ubutwererane, Gen (Rtd) James Kabarebe.

Ubwo Perezida wa Mozambique Daniel Chapo yageraga ku kibuga cy’ indge i Kanombe

Ambasaderi wa Mozambique mu Rwanda, Amade Miquidade, yasobanuriye itangazamakuru ko uruzinduko rwa Perezida Chapo mu Rwanda rugamije ubufatanye mu nzego zirimo umutekano n’ubukungu.

Yagize ati “Byiyongera ku birebana na politiki n’umutekano, uruzinduko rwa Perezida kandi rureba no ku rwego rw’ubukungu. Hateganyijwe inama n’abashoramari barimo abahagarariye urwego ruteza imbere ishoramari.”

Uyu mudipolomate yasobanuye ko nyuma y’ikiganiro cy’abakuru b’ibihugu bombi, kuri uyu wa 27 Kanama hateganyijwe inama ihuza abayobozi bo mu nzego zitandukanye z’u Rwanda na Mozambique, irebana n’ubufatanye.

Perezida Kagame yakiriye mugenzi we wa Mozambique Perezida Daniel Chapo

Biteganyijwe ko Perezida Chapo asura urwibutso rwa Jenoside rwa Kigali ku Gisozi, azaganira kandi n’abashoramari bo mu Rwanda, asure icyanya cyahariwe inganda i Masoro ndetse azanahura n’ abanya Mozambique baba mu Rwanda

Uruzinduko rw’ uyu mukuru w’ igihugu mu Rwanda rukazasozwa n’ikiganiro azagirana n’abanyamakuru

Leave A Reply

Your email address will not be published. Required fields are marked *

Related Posts