Icyiciro cya kabiri cy’Itorero Imbuto Zitoshye, rigamije gutoza no gutegura urubyiruko ruri muri gahunda ya Edified Generation ya Imbuto Foundation, cyasojwe kuri uyu wa 22 Ugushyingo 2025, Minisiteri y’Uburezi isaba abaryitabiriye kutagira amasomo bahawe nk’amasigaracyicaro ahubwo bakayashyira mu bikorwa mu buzima bwabo bwa buri munsi.
Iri torero, ryateguwe na Imbuto Foundation ku bufatanye n’inzego zitandukanye, rigahuriza hamwe abanyeshuri bishyurirwa amafaranga y’ishuri n’ibikoresho byose bikenerwa binyuze muri gahunda ya Edified Generation, ryari rifite intego yo kubongerera ubumenyi bushingiye ku ndangagaciro, kwigirira icyizere no kurushaho kumenya uruhare rwabo mu muryango Nyarwanda.
Mu gihe cy’icyumweru cyose, kuva ku wa 14 kugeza ku wa 22 Ugushyingo, Intore 131 zahawe amasomo atandukanye arimo imyitwarire myiza, gukunda igihugu, imiyoborere, imibanire myiza, kwirinda ibishobora kubayobya ndetse no gusobanukirwa amahirwe ari mu rugendo rwabo rw’uburezi.
Umuyobozi Mukuru wa Imbuto Foundation, Elodie Shami, yashimiye MINUBUMWE n’abandi bafatanyabikorwa ku ruhare rwabo mu gutegura no gutanga ubu bumenyi bw’ingenzi. Yibukije urubyiruko ko “ubuzima bufite intego ari bwo bubashobora kugera ku byiza”, abasaba kwihatira guharanira iterambere ryabo n’iriry’igihugu.
Minisitiri w’Uburezi, Nsengimana Joseph, ubwo yasozaga iri torero, yasabye Intore kurangwa n’imico iganisha ku bwubahane, umurava n’ubunyangamugayo, kandi bakirinda icyababuza kugera ku ntego.
Yagize ati: “Ibyo mwize ntibibe amasigaracyicaro. Mujye mwitwara mu buryo buhesha ishema ababyeyi, abarezi n’igihugu. Ubutwari n’indangagaciro ni byo bizabafasha kubaka ejo heza.”
Yanasabye urubyiruko kurangwa no gukunda igihugu no kugikorera, aho kwirinda ingeso mbi, ibiyobyabwenge n’amateka mabi akunda kubangamira urubyiruko ku mbuga nkoranyambaga.
Bamwe mu banyeshuri basoje amasomo bavuze ko aya mahugurwa yabafashije kongera icyizere no gusobanukirwa neza uruhare rwabo mu iterambere ry’igihugu. Basabye ko aya mahirwe akomeza guhabwa urundi rubyiruko rwo mu gihugu hose.
Icyiciro cya kabiri cy’Itorero Imbuto Zitoshye gisojwe, Imbuto Foundation ikaba ikomeje gahunda yo kubaka urubyiruko rwifitemo indangagaciro, ubunyangamugayo n’ubushobozi bwo gutanga umusanzu wubaka u Rwanda rwejo.
