Minisiteri ya Siporo yateguye umwiherero wo gukarishya impano z’abana barenga 500 mu mikino itandandatu isanzwe muri Porogaramu Isonga igamije kuzizamura.
Uyu mwiherero uteganyijwe tariki ya 31 Ukwakira kugeza ku ya 3 Ugushyingo 2024 mu Karere ka Huye na Gisagara, mu bigo nka GSO Butare, TTC Save ndetse no kuri Stade ya Huye.
Aba bana 500 bazaturuka mu bigo bisanzwe bibarizwamo porogaramu Isonga, irerero rya PSG na Bayern Munich, Intare FC mu bahungu, APR FC y’abatarengeje imyaka 16 mu bakobwa ndetse na Tony Football Academy.
Minisitiri wa Siporo, Nyirishema Richard, yavuze ko bashishikajwe n’iterambere ry’imikino bahereye mu bakiri bato.
Yagize ati “Minisiteri ya Siporo ishishikajwe no gutegura impano z’abakiri bato mu rwego rwo kubaka umusingi uhamye wa siporo yacu. Abana bagaragaje impano zidasanzwe bazahuzwa na porogarame zihari zigajime iterambere.”
Uyu mwiherero uzakorwa mu mikino itandatu nk’umupira w’amaguru, Volleyball, Basketball, Amagare, Handball mo gusiganwa ku maguru.
Abazahiga abandi bazahabwa ibikombe, buruse zo kwiga n’ibikoresho bitandukanye.
