Kuri uyu wa mbere tariki 16 Kamena 2025, abasirikare bakuru 108 bakomoka mu bihugu 20 basoje amasomo mu ishuri rikuru rya Gisirikare rya Nyakinama.
Ni mu muhango witabiriwe n’abayobozi bakuru b’ igihugu batandukanye barimo Minisitiri w’ Intebe Dr. Edouard Ngirente n’ Umugaba mukuru w’ Ingabo z’ U Rwanda General Mubaraka Muganga.
Aba bofisiye bakaba baturuka mu bihugu 19 byo muri Afurika, ndetse na Jordanie bakaba bamaze ibyumweru 47 bahugurwa, aho bagize umwanya wo kwiga ku bibazo by’umutekano hirya no hino ku Isi, basesengura ingaruka bigira kuri politiki y’ibihugu n’imibanire n’amahanga n’ibindi.
Mu ijambo rye, Minisitiri w’Intebe, Dr. Ngirente Edouard, yasabye aba basirikare basoje amasomo gukomeza gushyira imbaraga mu kurinda ubusugire bw’ibihugu byabo no kurangwa n’indangagaciro nzima.
Abo basirikare bari bamaze umwaka biga barimo Abanyarwanda 82 bo mu Ngabo z’u Rwanda, Polisi y’Igihugu n’Urwego rw’Igihugu rushinzwe igorora (RCS), na ho abanyamahanga ni 26, bakaba basoje amasomo ajyanye n’imiyoborere mu bya gisirikare (Senior Command and staff Course).
Umuyobozi w’Ishuri Rikuru rya Gisirikare rya Nyakinama, Brig Gen Andrew Nyamvumba, yasobanuye ko bahawe amasomo yo kubongerera ubumenyi ku buryo bwo guhanahana amakuru, kuyobora ingabo ku rugamba, kunoza imikorere y’akazi kabo ko mu biro n’andi.
Ati “Aya masomo ntabwo yazamuye ubumenyi mu gusesengura amakuru n’imiyoborere gusa ku basirikare bacu, ahubwo yanabashyizemo umutima wo gukora kinyamwuga no kugira imitekerereze ya ngombwa muri iki gihe cy’ikoranabuhanga.”
Yakomeje ati “Turabasaba gukomeza gukora neza, kugira umuhate no kuba inyangamugayo mu nshingano muzajyamo ahazaza. Reka ubunararibonye n’ubumenyi mwakuye muri aya masomo bizabayobore mu gutanga umusanzu ku gushakira ibihugu byacu n’Isi muri rusange amahoro n’umutekano.”
Muri abo basirikare barangije amasomo, 73 bahawe impamyabumenyi y’icyiciro cya gatatu cya Kaminuza mu masomo ajyanye n’umutekano (Masters of Arts in security studies) itangwa na Kaminuza y’u Rwanda.
Umuyobozi Mukuru wa Kaminuza y’u Rwanda, Assoc. Prof. Muganga Didas Kayihura, yashimangiye ko umutekano ari urutirigongo rw’iterambere rirambye, asaba abarangije amasomo yabo kugira uruhare mu gukemura imbogamizi zishobora gukoma mu nkokora umutekano n’iterambere.
Minisitiri w’Intebe, Dr. Edouard Ngirente, yagaragaje ko ibihe Isi igezemo bisaba kugira abayobozi beza babasha guhangana n’ibibazo ibihugu bihura na byo umunsi ku wundi ari na yo mpamvu hagiyeho Ishuri Rikuru rya Gisirikare.
Yasabye abarangije amasomo yabo gukomeza kurangwa n’indangagaciro n’imikorere myiza ikwiye kubaranga.
Ati “Ibi ntabwo ari intambwe nziza ku giti cyanyu gusa ahubwo ni igishoro gikomeye mu by’umutekano ku bihugu byacu…nk’uko mugiye kujya mu nshingano, muzahore muzirikana ko ubuyobozi budashingiye gusa ku gutegeka ahubwo ni ugutanga serivisi ku gihugu cyawe n’abagituye.”
Yongeyeho ati “Bisaba umurava, gukorera hamwe no kwiyemeza gukorera igihugu, ibyemezo byanyu bizahindura ibisirikare by’ibihugu byacu, umugabane wa Afurika n’Isi muri rusange.”
Muri ibi birori byari bibaye ku ncuro ya 13 hakaba kandi hahembwe abanyeshuri bahize abandi mu gihe cy’amasomo aho Col Dr. Dan Gatsinzi wo muri RDF yahembwe nk’uwahize abandi.
