Ikipe ya APR WVC mu bagore na Police VC mu bagabo, zegereje cyane kwegukana Igikombe cya Shampiyona y’Icyiciro cya Mbere muri Volleyball 2026, nyuma yo gutsinda imikino ya kabiri mu ruhererekane rw’imikino itanu ya nyuma ya kamarampaka.
Iyi mikino yabereye muri Petit Stade ku wa Gatandatu, tariki ya 4 Mata 2026, aho amakipe yari yatsinze imikino ibanza yashakaga gukomeza kwigaragaza, mu gihe ayatsinzwe yashakaga kwisubiza icyizere.
Police WVC yegereje gutwara umwanya wa gatatu
Mu mukino wabanje guhera Saa 12:30, ikipe ya Police WVC yatsinze RRA amaseti 3-2 (25-16, 21-25, 25-18, 24-26, 15-13) mu guhatanira umwanya wa gatatu mu bagore.
Iyi ntsinzi ya kabiri kuri Police WVC ishyira iyi kipe ku ntera nziza, aho isabwa gutsinda umukino umwe gusa mu isigaye kugira ngo ihite yegukana umwanya wa gatatu.
Ni mu gihe RRA yabonye iseti yayo ya mbere muri aya marushanwa ya kamarampaka, nyuma yo gutsindwa na APR WVC imikino 3-0 muri ½.
Kepler VC ikomeje kwitwara neza mu bagabo
Mu bagabo, Kepler VC yongeye gutsinda Gisagara VC amaseti 3-0 (25-23, 25-17, 25-19) mu mukino wo guhatanira umwanya wa gatatu, ihita iyobora n’intsinzi 2-0 mu mikino itanu.
APR WVC ikomeje gusatira igikombe
Umukino wagaragaye nk’uw’umunsi mu bagore, wahuje APR WVC na Kepler WVC, aho amakipe yombi yatanze ibishoboka byose kugeza hakinwe amaseti atanu.
APR WVC yegukanye intsinzi y’amaseti 3-2 (25-21, 23-25, 23-25, 26-24, 15-13), ihita igira intsinzi 2-0 mu mikino ya nyuma.
Iyi kipe y’ingabo z’igihugu ubu isabwa gutsinda umukino umwe gusa kugira ngo yegukane igikombe cya shampiyona cy’uyu mwaka, cyari gisanzwe gifitwe na Police WVC itageze ku mukino wa nyuma.
Police VC isigaje intsinzi imwe ngo yandike amateka
Mu bagabo, umukino wahuje Police VC na REG VC na wo wari urimo guhangana gukomeye cyane.
Police VC yatangiye neza itsinda iseti ya mbere (25-13), ariko REG VC yihagararaho itwara amaseti abiri yakurikiyeho (25-23, 25-22). Police VC yongeye kwisubiza umukino itsinda iseti ya kane (25-23), bituma hakinwa iya kamarampaka.
Muri iyi seti ya nyuma, amakipe yombi yakomeje kugendana, ariko Police VC iyegukana ku manota 23-21, ihita igira intsinzi 2-0 mu mikino ya nyuma.
Iyi kipe isigaje gutsinda umukino umwe gusa mu mikino itatu isigaye, kugira ngo yegukane Igikombe cya Shampiyona ku nshuro yayo ya mbere.
Imikino ya kamarampaka izakomeza tariki ya 17 Mata 2026 mu cyiciro cy’abagabo, hakinwa imikino yo guhatanira umwanya wa gatatu n’uwo guhatanira igikombe.
Mu bagore ho, imikino izasubukurwa tariki ya 3 Gicurasi 2026, aho hazakinwa umukino wo guhatanira umwanya wa gatatu ndetse n’uwo guhatanira igikombe.
