Mu mpera z’ iki cyumweru shampiyona y’ icyiciro cya mbere mu mupira w’amaguru mu Rwanda irasubukurwa hakinwa imikino yo ku munsi wa cumi.
Akaba ari nyuma y’isozwa ry’imikino y’Ikipe y’Igihugu yo gushaka itike y’Igikombe cya Afurika cya 2025 na yo yasojwe ku wambere w’ iki cyumweru turimo.
Kuri uyu munsi wa cumi wa shampiyona hateganyijwe imikino myinshi haba ku wagatanu, kuwa gatandatu ndetse no ku cyumweru ku bibuga bitandukanye bisanzwe biberaho imikino y’ icyiciro cya mbere.
Ni imikino izabanzirizwa n’uwo Kiyovu Sport izaba yakiriyemo Etincelles kuwagatanu tariki 22 Ugushyingo 2024 mu mukino uzabera kuri Pele Stadium guhera I saa cyenda z’amanywa.
Ku munsi ukurikiyeho , Bugesera izakira Vision, Marine FC yakire Police FC, Gasogi United yakire Musanze, mu gihe kuri uwo munsi ikipe y’ ingabo z’ igihugu izakira Muhazi United kuri Pele Stadium guhera saa kumi n’ebyiri z’ umugoroba (18h:00)
Shampiyona iragaruka guhera kuri uyu wagatanu
Ku munsi wo ku cyumweru tariki 24 Ugushyingo 2024, Amagaju FC azakira AS Kigali kuri Stade mpuzamahanga ya Huye, Gorilla FC yakire Rayons Sport mu mukino w’ishiraniro uzabera kuri Pele Stadium mu gihe I Rubavu Rutsiro FC izakira Mukura Victory Sport.
Kugeze ubu Rayons Sport FC ni yo iyoboye urutonde rw’agateganyo rwa Shampiyona n’amanota 20, ikurikiwe na Gorilla FC ifite 18, AS Kigali ikaba ari iya gatatu n’amanota 17 mu gihe Vision FC na Kiyovu Sport ari zo ziri mu murongo utukura mu myanya ibiri ya nyuma.
Uko urutonde ruhagaze kugeza ubu
