Ikigo cy’Igihugu gishinzwe ingufu (REG) cyatangaje ko mu turere twa Gicumbi, Nyagatare na Gatsibo hateganyijwe ibura ry’amashanyarazi kuva Saa Moya za mu gitondo kugeza Saa Moya z’ijoro, ndetse no mu bice bimwe bya Kigali mu gihe cy’amasaha ane, hagamijwe kwagura no gusana imiyoboro y’amashanyarazi.
Mu itangazo REG yashyize ahagaragara kuri uyu wa 11 Ugushyingo 2025, yagaragaje ko ibi bibazo bizaterwa n’imirimo yo gusana Sitasiyo y’Amashanyarazi ya Gabiro iri mu Karere ka Gatsibo ndetse n’umuyoboro wa Kibagabaga–Nyarutarama. Iyi mirimo izakorwa ku itariki ya 15 Ugushyingo 2025.
Kuri uwo munsi kuva Saa Moya za mu gitondo kugeza Saa Moya z’umugoroba, amashanyarazi azabura mu turere twa Gatsibo, Nyagatare na Gicumbi.
Na none, kuva Saa Tanu z’amanywa kugeza Saa Cyenda z’umugoroba, umuriro uzabura mu Murenge wa Remera mu Karere ka Gasabo (Umujyi wa Kigali), cyane cyane mu bice bimwe by’Akagari ka Nyarutarama.
Mu buryo burambuye, muri Gatsibo umuriro uzabura mu mirenge ya Kabarore, Rugarama, Rwimbogo, Kiziguro, Kiramurizi, Murambi, Gasange, Muhura, Remera, Kageyo, Ngarama, Gatsibo n’igice cya Nyagihanga.
Muri Gicumbi amashanyarazi azabura mu mirenge ya Bwisige, Ruvune, Giti, Muko, Bukure, Rwamiko, Rutare, Rukomo, na Nyamiyaga, ndetse no mu bice by’imirenge ya Rushaki, Mukarange na Mutete.
Ni mu gihe muri Nyagatare umuriro uzabura mu mirenge yose y’akarere.
REG yasabye abaturage kwirinda kwegera insinga z’amashanyarazi cyangwa ibikoresho byayo muri ibyo bihe, kuko umuriro ushobora kugaruka mbere y’amasaha wari wateganyijwe.
Iri tangazo rije nyuma y’iminsi micye habaye ibibazo bya tekiniki ku miyoboro u Rwanda ruhuriyeho n’ibihugu bituranyi, byateye ibura ry’amashanyarazi rikomeye ku wa 9 Ugushyingo 2025 mu bice byinshi by’igihugu.
