Umutoza Mukuru wa Al Hilal SC, Laurențiu Reghecampf, yemeje ko iyi kipe yo muri Sudani yamaze gusinyisha myugariro w’Umunyarwanda Niyigena Clément wakiniraga APR FC.
Reghecampf yabitangaje kuri uyu wa Kane mu kiganiro n’itangazamakuru, ubwo Al Hilal SC yari iri kwitegura umukino uzayihuza na Mamelodi Sundowns mu marushanwa ya CAF Champions League.
Ati: “Twamaze gusinyisha myugariro wo hagati w’Umunyarwanda. Turizera ko agiye kudufasha, ariko byose bizaterwa n’uko azisanga mu ikipe n’uko azihutira kumenyera imikinire yacu.”
Niyigena Clément yari umwe mu bakinnyi ngenderwaho muri APR FC, ndetse akaba ahamagarwa mu Ikipe y’Igihugu ‘Amavubi’. Yari yongereye amasezerano y’imyaka ibiri muri Kamena 2024, nyuma yo kurangiza ayo yari yarahawe mu 2022 avuye muri Rayon Sports.
Mbere yo kwerekeza muri Gikundiro, Niyigena yari umukinnyi wa Marines FC, aho yitwaye neza mu bwugarizi.
Uyu myugariro aherutse no gutorwa nk’umukinnyi mwiza w’umwaka muri Shampiyona y’u Rwanda ya 2024/2025.
Muri uwo mwaka w’imikino, yafashije Ikipe y’Ingabo z’Igihugu kwegukana ibikombe bitatu: Shampiyona, Igikombe cy’Amahoro n’Igikombe cy’Intwari.
