Madamu Jeannette Kagame yifatanyije n’abatuye Umujyi wa Kigali muri siporo rusange izwi nka Car Free Day, kuri iyi nshuro yari yahariwe kwizihiza Umunsi Mpuzamahanga w’Abagore.
Iyi siporo yabaye ku wa 8 Werurwe 2026, itegurwa ku bufatanye bwa Minisiteri y’Uburinganire n’Iterambere ry’Umuryango (MIGEPROF), Minisiteri ya Siporo ndetse n’Umujyi wa Kigali, mu rwego rwo kwishimira uruhare rw’abagore mu muryango no mu iterambere ry’igihugu.
Mu butumwa bwanyujijwe ku rubuga rwa X, Madamu Jeannette Kagame yagaragaje ko yishimiye kwifatanya n’abanya-Kigali muri iyi siporo rusange idasanzwe.
Ubutumwa bwatangajwe bugira buti:
“Madamu Jeannette Kagame yifatanyije n’abagore n’abatuye mu Mujyi wa Kigali muri siporo rusange, yateguwe na Minisiteri y’Uburinganire n’Iterambere ry’Umuryango, Minisiteri ya Siporo n’Umujyi wa Kigali mu kwizihiza abagore, imibereho myiza n’ibyishimo by’umuryango.”
Mu bandi bayobozi bitabiriye iki gikorwa harimo Minisitiri wa Siporo, Nelly Mukazayire, ndetse n’abandi bayobozi baturutse mu nzego zitandukanye.
Umujyi wa Kigali watangaje ko iyi Car Free Day yahujwe no kwizihiza Umunsi Mpuzamahanga w’Abagore, ndetse nyuma ya siporo hakabaho n’ibikorwa byo kwipimisha indwara zitandura (NCDs).
Mu itangazo ryashyizwe hanze n’Umujyi wa Kigali, hagaragajwe ko iki gikorwa cyabereye umwanya mwiza wo kongera kwibutsa agaciro k’umugore mu muryango no mu iterambere ry’igihugu.
Rigira riti:
“Kuri iki Cyumweru, Abanya-Kigali twahuriye muri siporo rusange ya #CarFreeDay yahujwe no kwizihiza Umunsi Mpuzamahanga w’Abagore. Twongeye kuzirikana ko umugore ari uw’agaciro kandi afite uruhare rukomeye mu muryango no mu iterambere ry’igihugu.”
Iri tangazo kandi ryagaragaje ko abitabiriye baboneyeho no kwipimisha indwara zitandura ndetse bagahabwa inama z’uburyo bwo kurushaho kwita ku buzima bwabo.
Abitabiriye iki gikorwa bakoze imyitozo itandukanye irimo kugenda n’amaguru, kwiruka, kunyonga amagare ndetse na aerobic, mu rwego rwo guteza imbere ubuzima bwiza.
Car Free Day yatangijwe muri Gicurasi 2016 igamije gushishikariza abatuye Umujyi wa Kigali gukunda siporo no kugira ubuzima bwiza. Iyi gahunda kandi ifasha abaturage kumenya uko bahagaze ku buzima bwabo binyuze mu gupimwa indwara zitandukanye ku buntu no guhabwa inama z’abaganga.
Nubwo yatangiriye mu Mujyi wa Kigali, iyi siporo rusange imaze gukwirakwira hirya no hino mu gihugu, aho n’izindi ntara zigenda ziyitabira.
Umujyi wa Kigali uvuga ko Car Free Day ari n’umwanya wo gukomeza kubungabunga ibidukikije no kurengera ikirere, binyuze mu kugabanya ikoreshwa ry’ibinyabiziga mu gihe runaka.
Muri icyo gihe, imihanda imwe n’imwe yo mu Mujyi wa Kigali ifungwa hagati ya saa Moya na saa Yine za mu gitondo, igaharirwa abakora siporo ku maguru no ku magare.
