Umukinnyi w’ ikipe y’ Igihugu Gitego Arthur ari kubarizwa muri Maroc, aho yagiye kurangizanya na Raja Casablanca iri mu makipe y’ubukombe muri iki gihugu.
Gitego asanzwe ukinira Clube Ferroviário da Beira yo muri Mozambique, yerekeje muri Maroc ku wa Gatanu.
Ubwo yavuganaga n’ itangazamakuru, Gitego yatangarije ko atagiye mu igeragezwa ahubwo biteganyijwe ko ashyira umukono ku masezerano y’imyaka ine.
Yagize ati “ Yego nibyo. Ndasinya imyaka ine.”
Iyi kipe ya Raja Casablanca Gitego ashobora kwerekezamo ni ikipe y’ubukombe muri Maroc no muri Afurika muri rusange. Yegukanye Igikombe cya Shampiyona inshuro 13 n’icy’Igihugu inshuro icyenda.
Raja Casablanca kandi izwi cyane ku ruhando mpuzamahanga kuko yegukanye CAF Champions League inshuro eshatu mu 1989, 1997 na 1999. Ni mu gihe yanatwaye CAF Confederation Cup ebyiri, mu 2018 na 2021.
Gitego Arthur ni rutahizamu wamenyekanye cyane muri Marine FC, yavuyemo yerekeza muri AFC Leopard yo muri Kenya yakinnyemo umwaka umwe, mbere yo kujya muri Clube Ferroviário da Beira yo muri Mozambique
