Filime Ben’Imana yayobowe n’Marie-Clémentine Dusabejambo yegukanye igihembo cya ‘Caméra d’Or’ mu Iserukiramuco rya Festival de Cannes, kimwe mu bihembo bikomeye muri sinema mpuzamahanga gihabwa filime ya mbere ndende yitwaye neza kurusha izindi.
Iki gihembo cyatangiwe mu muhango wo gusoza Cannes 2026, aho Ben’Imana yahigitse izindi filime za mbere 30 zari mu byiciro bitandukanye by’iri serukiramuco. Yari yaratoranyijwe mu cyiciro cya ‘Un Certain Regard’, kizwiho kwakira filime zifite uburyo bwihariye bwo kuvuga inkuru no gusesengura ibibazo byimbitse by’umuryango.
Filime Ben’Imana yibanda ku mateka ya Jenoside yakorewe Abatutsi, ubutabera, imbabazi n’urugendo rw’ubwiyunge bw’Abanyarwanda nyuma y’ibihe bikomeye igihugu cyanyuzemo.
Inkuru yayo ishingiye ku nkiko Gacaca, aho igaruka ku rugendo rwo kuvuga ukuri no gushaka ubutabera nyuma ya Jenoside. Yerekana ubuzima bwa Veneranda, umugore usaba imbabazi imbere y’abaturage, Suzanne ushaka ukuri ku rupfu rw’umuryango we, na Tina, umukobwa ugaragaza uburyo urubyiruko rutabonye Jenoside rugikomeje kubaho mu ngaruka zayo.
Iyi filime igaragaza uburyo ukuri, imbabazi n’ubutwari bw’abagore bishobora kugira uruhare mu kongera kubaka igihugu no gukiza ibikomere by’amateka.
Marie-Clémentine Dusabejambo yavuze ko yakoze iyi filime agamije guha icyubahiro abagore b’Abanyarwanda, cyane cyane ababyeyi bagize uruhare rukomeye mu kubaka ubumwe n’ubwiyunge nyuma ya Jenoside yakorewe Abatutsi.
Perezida w’akanama nkemurampaka ka Caméra d’Or, Monia Chokri, yavuze ko iki gihembo gihawe umuntu wahisemo kuvuga amateka akomeye aho guceceka.
Iyi ntsinzi ifatwa nk’indi ntambwe ikomeye kuri sinema nyarwanda kuko ari ubwa mbere filime nyarwanda yegukanye iki gihembo gikomeye muri Cannes.
Ben’Imana kandi ni umushinga mpuzamahanga wahurijwemo abahanzi n’abatunganya filime bo mu Rwanda, Gabon, Côte d’Ivoire, Norvège n’u Bufaransa. Mu bayigizemo uruhare harimo Samantha Biffot.
Umunyamabanga Leta muri Minisiteri y’ urubyiruko n’ iterambere ry’ ubuhanzi ,Umutoni Sandrine witabiriye uyu muhango yavuze ko iyi filime yafashije u Rwanda na Afurika muri rusange kurushaho kumenyekana ku rwego mpuzamahanga binyuze mu buhanga bwa sinema.
Naho Yolande Makolo, Umuvugizi wa Leta y’ u Rwanda yanditse ku rukuta rwe rwa X aashimangira ko gutoranywa no gutsindira kwa Ben’Imana ari ishema rikomeye ku Rwanda no ku bahanzi b’Abanyarwanda, kuko byerekanye ubushobozi bwabo bwo kuvuga amateka y’igihugu mu buryo bukora ku mutima w’abareba filime ku Isi yose.
