Umukinnyi wa Leonard Craig Randall yanditse amateka mashya mu irushanwa rya Basketball Africa League (BAL), nyuma yo gutsinda amanota 54 mu mukino umwe, anatsinda amanota atatu inshuro 11.
Ibi yabigezeho mu mukino ikipe ya RSSB Tigers akinira yatsinzemo Dar City amanota 104 kuri 92, mu mikino ya Kalahari Conference.
RSSB Tigers yari yagiye muri uyu mukino ihabwa amahirwe, kuko yari imaze gutsinda imikino itatu yose yakinnye, mu gihe Dar City yo yari ifite intsinzi ebyiri n’umukino umwe yatsinzwe.
Umukino watangiye impande zombi zihanganye cyane, aho Leonard Craig Randall na Sisco George Ngaiza batsindiraga amakipe yabo. Agace ka mbere karangiye Dar City iyoboye n’amanota 25 kuri 24.
Mu gace ka kabiri, umukino wakomeje kwegerana cyane, ariko mu minota ya nyuma Tigers itangira kongera ikinyuranyo ibifashijwemo na Mangok Mathiang. Igice cya mbere cyarangiye RSSB Tigers iyoboye n’amanota 52 kuri 45.
Mu gace ka gatatu, Dar City yatangiye nabi cyane, kuko mu minota itanu ya mbere yari imaze gutsinda amanota atatu gusa, mu gihe Tigers yari imaze gutsinda 10. Aka gace karangiye Tigers ikiyoboye umukino n’amanota 75 kuri 65.
Mu gace ka nyuma, RSSB Tigers yakomeje kugenzura umukino neza, cyane ko Dar City yabuze ibisubizo byo guhagarika Leonard Craig Randall wari uri ku rwego rwo hejuru uwo munsi.
Uyu mukino warangiye Tigers itsinze amanota 104 kuri 92, iba ibonye intsinzi ya kane muri iri rushanwa.
Muri uyu mukino, Leonard Craig Randall yashyizeho agahigo gashya ko gutsinda amanota menshi mu mukino umwe wa BAL, aho yatsinze 54, akuraho aka Jo Lual-Acuil Jr wari ufite amanota 42 mu 2024.
Yanashyizeho akandi gahigo ko gutsinda amanota atatu inshuro nyinshi mu mukino umwe (11), akuraho aka Axel Mpoyo wari ufite 10.
RSSB Tigers izasoza imikino ya Kalahari Conference ihura na Nairobi City Thunder ku Cyumweru, tariki ya 5 Mata 2026.
