APR FC yasoje irushanwa rya CECAFA Kagame Cup 2025 ryaberaga muri Tanzania, aho yegukanye umwanya wa gatatu itsinze KMC FC igitego 1-0 ku mukino wabaye ku wa Mbere, tariki ya 15 Nzeri 2025.
Ikipe y’Ingabo z’Igihugu yatangiye umukino isa n’ishakisha uko yakwinjirana u
bwirinzi bwa KMC, ariko uburyo bwinshi bwa Mugisha Gilbert na William Togui ntibwagiize icyo butanga. Ku munota wa 45, Memel Raouf Dao yacomekewe umupira na Dauda Yussif, awutera ishoti rikomeye afungura amazamu.
Igice cya kabiri cyaranzwe n’ishyaka ryinshi rya KMC FC yo muri Tanzania, ariko umunyezamu Ishimwe Pierre akuramo imipira myinshi. Ku munota wa 77, William Togui yahushije igitego cyari cyabazwe, umukino urangira APR FC yegukanye intsinzi n’umwanya wa gatatu ndetse n’igihembo cya $10,000 (arenga gato miliyoni 14 Frw).
Umunya-Burkina Faso Memel Raouf Dao, ufite imyaka 21, yatowe nk’umukinnyi mwiza w’irushanwa.
Ni nyuma y’ uko yatsinze ibitego bibiri, anatanga imipira ibiri yavuyemo ibitego byatsinzwe na bagenzi be, ndetse atorwa nk’umukinnyi w’umukino inshuro ebyiri muri iri rushanwa.
Dao winjiye muri APR FC mu mpeshyi ya 2025 avuye muri AS Sonabel Ouagadougou, yari yaranabaye umukinnyi w’umwaka muri Burkina Faso.
Ni ku nshuro ya kabiri yikurikiranya umukinnyi wa APR FC aba umukinnyi w’irushanwa, nyuma ya Niyigena Clément wagitwaye mu mwaka ushize.
Iri rushanwa rihuza amakipe yo muri Afurika y’Iburasirazuba n’iyo Hagati, riterwa inkunga na Perezida Paul Kagame kuva mu 2002. Ryegukanywe na *Singida Black Stars yo muri Tanzania yatsinze Al Hilal yo muri Sudani ibitego 2-1 ku mukino wa nyuma.
