Ikigo cy’Igihugu gishinzwe Ubuzima (RBC) cyatangaje ko Abanyarwanda bakoresha serivisi zo kuboneza urubyaro bakomeje kwiyongera kuko kuva mu myaka hafi itanu ishize biyongeyeho ibihumbi birenga 450 bituma barenga miliyoni ebyiri.
RBC igaragaza ko muri rusange umubare w’abahabwa serivisi zo kuboneza urubyaro ugenda uzamuka mu Rwanda kuko umwaka w’ingengo y’imari warangiye ku itariki 30 Kamena 2020 wasize Abanyarwanda baboneza urubyaro ari 1.632.018.
Mu mwaka w’ingengo y’imari wakurikiyeho muri Kamena 2021 bageze kuri 1.751.899, bigeze mu 2022 baba 1.835.708 babonezaga urubyaro mu gihugu hose.
Mu mwaka w’ingengo y’imari warangiye ku itariki 30 Kamena 2023 Abanyarwanda bahabwa serivisi zo kuboneza urubyaro bageze kuri 1.927.230, bigeze muri Kamena 2024 bagera kuri 2.075 .178.
Kuva muri Nyakanga 2024; ni ukuvuga muri uyu mwaka w’ingengo y’imari uri kugana ku musozo kugera muri Werurwe 2025 Abanyarwanda bahabwa serivisi zo kuboneza urubyaro bageze kuri 2.090.570.
RBC igaragaza ko muri abo baboneza urubyaro abenshi ari abagore ariko hakaba n’abagabo bahabwa iyo serivisi mu gihe bifungishije burundu ibizwi nka ‘vasectomy’ n’abakoresha agakingirizo birinda gutera inda.
Mu bahabwa serivisi zo kuboneza urubyaro abenshi ni abazihererwa ku bigo nderabuzima kuko bagize ijanisha rya 85% mu gihe abagera ku 9% bazihererwa ku mavuriro y’ibanze.
Abandi bagize ijanisha rya 3% by’abahabwa serivisi zo kuboneza urubyaro mu Rwanda bazihererwa ku bitaro bya Leta, naho 2% bakaba ari bo bazihererwa mu mavuriro yigenga.
Abenshi bakoresha uburyo bw’ inshinge
RBC igaragaza ko isuzuma yakoze rishingiye ku baboneje urubyaro kugeza muri Werurwe 2025 rigaragaza ko uburyo bwo kuboneza urubyaro hakoreshejwe inshinge ari bwo buza imbere mu gukoreshwa n’Abanyarwanda benshi.
Iyo mibare yo muri Werurwe 2025 igaragaza ko Abanyarwanda baboneza urubyaro bakoresheje inshinge bagize ijanisha rya 31,5% ry’ababoneza bose bagakurikirwa n’abakoresha uburyo bw’agapira gashyirwa mu kuboko k’imyaka itatu bangana na 25%.
Uburyo bukurikiraho mu gukoreshwa cyane ni ubw’agapira gashyirwa mu kuboko k’imyaka itanu bukoreshwa ku ijanisha rya 17% bugakurikirwa n’ubw’ibinini birimo umusemburo wa Estrogen n’uwa Progestin n’ibirimo umusemburo wa Progesterone gusa bikoreshwa ku ijananisha rya 16,8%.
Ubundi buryo mu Rwanda bukoreshwa mu buryo bugereranyije munsi y’ijanisha rya 3% harimo ubw’agapira gashyirwa muri nyababyeyi bukoresha
n’abagera kuri 2,3% naho agakingirizo k’abagabo gakoreshwa na 2,3%.
Uburyo bwo kuboneza urubyaro bwo kwifungisha burundu mu bagore bukoreshwa n’abagera ku ijanisha rya 1,7% naho uburyo bwo konsa bwo bukoreshwa n’abagera kuri 1,3%.
Hari kandi uburyo bwo kuboneza urubyaro mu Rwanda bukoreshwa n’abari munsi ya 1% harimo kwifungisha burundu ku bagabo bikoreshwa n’abagera kuri 0,3% n’ubundi buryo bune butandukanye bwose hamwe bukoreshwa n’abagera kuri 1,8%.
RBC igaragaza ko mu kuboneza urubyaro hakiri imbogamizi zo kuba mu mavuriro yigenga adatanga iyo serivisi ku kigero cyiza ndetse mu mavuriro yashinzwe n’amadini n’amatorero ntibatanga iyo serivisi.
Hari kandi ibigo nderabuzima n’ibitaro hafi 20% y’ibiri mu gihugu hose usanga bidafite uburyo bwose bugize serivisi yo kuboneza urubyaro bagatuma hari ababura ubwo bisangamo ndetse n’ikibazo cy’abakozi bo kwa muganga badahagije.
Ibyo byiyongeraho abana babyara bakiri bato na bo bafite ijanisha riri hejuru kandi bamwe muri bo bakaba bataboneza urubyaro.
